პოლიტიკა

საია-მ და „კონსტიტუციის 42-ე მუხლმა“ იუსტიციის საბჭოს მდივანს, გიორგი მიქაუტაძეს გადადგომისკენ მოუწოდეს

„საქართველოს ახალგაზრდა იურისტთა ასოციაციამ“ და „კონსტიტუციის 42-ე მუხლმა“ იუსტიციის საბჭოს მდივანს, გიორგი მიქაუტაძეს გადადგომისკენ მოუწოდეს. ამის შესახებ არასამთავრობოებმა ერთობლივ პრესკონფერენციაზე განაცხადეს.

მათი ინფორმაციით, საქმე ეხება 2 სისხლის სამართლის საქმეს, რომლებშიც, სავარაუდოდ, მიქაუტაძე ფიგურირებს.

„2016 წლის აგვისტოში დაიწყო და კვლავ ჭიანურდება იუსტიციის უმაღლესის საბჭოს მდივნის, გიორგი მიქაუტაძის მიერ არასრულწლოვნის სავარაუდო ცემის ფაქტთან დაკავშირებული გამოძიება, მიუხედავად იმისა, რომ იმავე ფაქტიდან გამომდინარეობს და იმავე დღეს დაიწყო გამოძიება მოქალაქე თამარ ხაჭაპურიძის მიერ გიორგი მიქაუტაძის მიმართ სისხლის სამართლის კოდექსის 365-ე მუხლით გათვალისწინებული დანაშაულის ჩადენის ფაქტზე. ამ საქმის გამოძიება დასრულებულია და ამჟამად საქმეს განიხილავს ხელვაჩაურის რაიონული სასამართლო. ორივე საქმეზე წელიწად-ნახევრის განმავლობაში განვითარებული მოვლენები მიუთითებს შერჩევით მიდგომაზე და აჩენს საფუძვლიან ეჭვს, რომ სასამართლო ხელისუფლების მაღალი თანამდებობის პირის მონაწილეობა ამ საქმეებში კანონის უზენაესობის საწინააღმდეგოდ ხელს უშლის მოქალაქის მიმართ სამართლიანი მართლმსაჯულების განხორციელებას“, - თქვა საიას თავმჯდომარემ, სულხან სალაძემ.

არასამთავრობოების შეფასებით, აღნიშნული საქმეები სასამართლოს ავტორიტეტს ზიანს აყენებენ და ამის გამო მიქაუტაძეს იუსტიციის უმაღლესი საბჭოს მდივნის პოსტის დატოვებისკენ მოუწოდეს.

გარდა ამისა, საია-მ და „კონსტიტუციის 42-ე მუხლმა“ მოუწოდეს მთავარ პროკურატურას, სწრაფად და ობიექტურად გამოიძიოს იუსტიციის უმაღლესი საბჭოს მდივნის მიერ თამარ ხაჭაპურიძის არასრულწლოვანი შვილის სავარაუდო ცემის ფაქტი.