პოლიტიკა

საია 2016 წლის არჩევნებზე დაყრდნობით ხელისუფლებას რეკომენდაციებით მიმართავს

დღეს „საქართველოს ახალგაზარდა იურისტთა ასოციაციამ“ ჩაატარა კონფერენცია თემაზე: „2016 წლის საპარლამენტო არჩევნებზე მიღებული გამოცდილება და სამომავლო ნაბიჯები 2017 წლის ადგილობრივი თვითმმართველობის არჩევნებისთვის“. ორგანიზაციამ ანგარიში 2016 წლის საპარლამენტო არჩევნებზე გამოვლენილ დარღვევებზე დაყრდნობით მოამზადა.

საიას თავმჯდომარის, ანა ნაცვლიშვილის განცხადებით, 2016 წელს როგორც წინასაარჩევნო პერიოდში, ასევე უშუალოდ კენჭისყრის დღეს არ იყო სათანადო რეაგირება ძალადობრივ ინციდენტებზე. მისი თქმით, მსგავს საქმეებზე გამოძიების შედეგები ამ დრომდე უცნობია.

„ერთ-ერთი გამოწვევა მაინც იყო არჩევნების მშვიდ და არაძალადობრივ გარემოში ჩატარება. მართალია, არ ყოფილა მასობრივი ძალადობის შემთხვევები, თუმცა როგორც წინასაარჩევნო პერიოდში, ასევე უშუალოდ კენჭისყრის დღეს, იყო ძალადობრივი ინციდენტები და მათ დიდ ნაწილზე ეფექტური რეაგირება არ მომხდარა. ასევე სხვა ტიპის დარღვევები, რომლებიც წინასაარჩევნოდ დაფიქსირდა, იქნებოდა ეს ოფისებზე თავდასხმა თუ სხვა ტიპის დარღვევები, რომელზეც გამოძიება მიმდინარეობს, მაგრამ ეფექტური შედეგები ამ დრომდე არ გვაქვს“,- განაცხადა ნაცვლიშვილიმა.

კონფერენციაზე საიამ ხელისუფლებას რეკომენდაციები წარუდგინა, რომელთა გათვალისწინება უნდა მოხდეს 2017 წლის ადგილობრივი თვითმმართველობის არჩევნებზე. ერთ-ერთი რჩევა ეხება წინასაარჩევნო, არჩევნების დღისა და შემდგომი პერიოდის დარღვევების დროულ გამოძიებას, ასევე ინკლუზიური და კონკურენტული საარჩევნო გარემოს ხელშეწყობას ქალებისთვის, შშმ პირებისა და ეთნიკური უმცირესობების წარმოამდგენლებისთვის.

შეგახსენებთ, ადგილობრივი თვითმმართველობის არჩევნები ოქტომბრის მესამე კვირის ბოლოს გაიმართება.