პოლიტიკა

საგარეო ურთიერთობათა კომიტეტის თავმჯდომარის მოადგილე დიმიტრი ცქიტიშვილი ევროპის საბჭოს საპარლამენტო ასამბლეის თანასწორობისა და ანტიდისკრიმინაციული კომიტეტის თავმჯდომარეს შეხვდა

სტრასბურგში მიმდინარე ევროპის საბჭოს საპარლამენტო ასამბლეის ზამთრის სესიის ფარგლები, საქართველოს პარლამენტის საგარეო ურთიერთობათა კომიტეტის თავმჯდომარის მოადგილე დიმიტრი ცქიტიშვილი ევროპის საბჭოს საპარლამენტო ასამბლეის თანასწორობისა და ანტიდისკრიმინაციული კომიტეტის თავმჯდომარეს, ელენა ჩენტემეროს შეხვდა.

მხარეებმა თანასწორობისა და ანტიდისკრიმინაციული კომიტეტის საქმიანობაში ქართული დელეგაციის წევრების როლის გაზრდასა და აქტიურ მონაწილეობაზე ისაუბრეს. შეხვედრაზე განხილული იყო კომიტეტის გასვლითი სხდომების გამართვის შესაძლებლობები.

როგორც დიმიტრი ცქიტიშვილმა განაცხადა, ჩვენს რეგიონში კომიტეტის გასვლითი სხდომების ჩატარება მნიშვნელოვანი იქნება როგორც საქართველოსთვის, სადაც გენდერული თანასწორობის საკითხები გარკვეული გამოწვევების წინაშე დგას, ასევე რეგიონისთვისაც, სადაც ამ კუთხით განსაკუთრებული პრობლემებია.

„მნიშვნელოვანია, რომ საერთაშორისო თანამეგობრობის მონაწილეობით განხილული იყოს ეს საკითხები, რაშიც სრული მხარდაჭრა გვქონდა ჩვენი კოლეგების მხრიდან. ვიმედოვნებთ, რომ მომდევნო წელს ამ თემაზე შეხვედრა გაიმართება, სადაც რეგიონალურ ჭრილში განხილული იქნება ეს საკითხები, რაც მნიშვნელონად წაადგება ამ კუთხით საქართველოში მიმდინარე პროცესებს“,-განაცხადა საგარეო ურთიერთობათა კომიტეტის თავმჯდომარის მოადგილემ, დიმიტრი ცქიტიშვილმა შეხვედრის კომენტირებისას.