პოლიტიკა

საგარეო მიმართულებით თითოეული გადაწყვეტილება ეროვნული ინტერესების შესაბამისად მიიღება- ირაკლი კობახიძე

საქართველოს პარლამენტის თავმჯდომარე ირაკლი კობახიძე რუსეთიდან ქართველი დიპლომატის გამოძევების საკითხს გამოეხმაურა. კობახიძის განცხადებით, საგარეო მიმართულებით თითოეული გადაწყვეტილება ეროვნული ინტერესების შესაბამისად მიიღება.

„თითოეული გადაწყვეტილება საგარეო პოლიტიკის მიმართულებით ჩვენ მიერ მიიღება ეროვნული ინტერესების შესაბამისად და ასევე, ჩვენი სტრატეგიული პარტნიორების ინტერესების გათვალისწინებით და ამ პარტნიორებთან კონსულტაციების საფუძველზე“, -განაცხადა კობახიძემ.

პარლამენტის თავმჯდომარემ აღნიშნა, რომ ქვეყნის საგარეო პოლიტიკის ეს კურსი უცვლელია.

„ჩვენთვის მთავარია, რომ ვმოქმედებდეთ ჩვენი ეროვნული ინტერესების შესაბამისად. ეს არის ჩვენი მიდგომა და ამ მიდგომით გაგრძელდება მუშაობა“, - აღნიშნა პარლამენტის თავმჯდომარემ.

შეგახსენებთ, რომ რუსეთის საგარეო საქმეთა სამინისტრომ შვეიცარიის საელჩოს საქართველოს ინტერესების სექციის ერთი თანამშრომლის რუსეთიდან გაწვევა მოითხოვა.

საქართველოს საგარეო საქმეთა სამინისტრომ რუსეთს ფედერაციის საგარეო უწყების შესაბამისი ნოტა შვეიცარიის კონფედერაციის საელჩოს გავლით მიიღო. ნოტაში აღნიშნულია, რომ “ეს წარმოადგენს რუსეთის მხარის საპასუხო ქმედებას საქართველოს 29 მარტის ანალოგიურ მოთხოვნაზე”.

საქართველოს საგარეო საქმეთა სამინისტრომ შვეიცარიის საელჩოს რუსეთის ინტერესების სექციის თანამშრომელი ქვეყნიდან გაძევების გადაწყვეტილება გაერთიანებული სამეფოს ტერიტორიაზე სერგეი სკრიპალის მოწამვლის ფაქტის გამო მიიღო.

ცირა გურგენიძე