სამართალი

საგამოძიებო კომისია საზოგადოებას 13 ივნისს გააცნობს იმ პირთა სიას, ვინც კომისიის წინაშე დაიკითხებიან

საგამოძიებო კომისია მტკიცებულებების გაცნობას იწყებს და საზოგადოებას ოთხშაბათს, 13 ივნისს აცნობებს იმ პირთა სიას, ვინც მოვლენ და კომისიის წინაშე დაიკითხებიან, - აცხადებს „ევროპული საქართველოს“ წევრი ოთარ კახიძე.

მისი თქმით, კომისიამ საქმის შესწავლა ზაზა სარალიძესთან და მის ადვოკატთან შეხვედრით დაიწყო.

,,ვრცელი შეხვედრა გვქონდა ზაზა სარალიძესა და მის ადვოკატთან, სადაც მთლიანად საქმის პერიპეტიები განვიხილეთ. საგამოძიებო კომისია ასევე თანამშრომლობს ნინო ლომჯარიასთან. სახალხო დამცველი მუშაობს აღნიშნულ საქმეზე და კოორდინირებულები ვართ საქმის შესწავლის ფარგლებში. ვიწყებთ მტკიცებულებების გაცნობას და საზოგადოებას ოთხშაბათს ვაცნობებთ იმ პირთა სიას, ვინც მოვლენ და კომისიის წინაშე დაიკითხებიან“,- აცხადებს ოთარ კახიძე.

როგორც „ევროპული საქართველოში“ ამბობენ, ხორავას ქუჩაზე მომხდარი მკვლელობის საქმის მასალები პარლამენტის საგამოძიებო კომისიას დღეს უნდა გადაეგზავნოს, რის შემდეგაც უნდა დაიგეგმოს, თუ რა ფორმატით მოხდება საქმესთან დაკავშირებული პირების გამოკითხვა.