პოლიტიკა

საფრანგეთის ელჩმა „ომეგას“ საქმეზე გავრცელებულ მასალას „შემაშფოთებელი“ უწოდა

საქართველოში საფრანგეთის საგანგებო და სრულუფლებიანი ელჩის, პასკალ მენიეს განცხადებით, საქართველოში აკრედიტებული ელჩები დააკვირდებიან „ომეგა ჯგუფის“ საქმის გამოძიებას.

საფრანგეთის ელჩმა „ომეგას“ საქმეზე გავრცელებულ მასალას „შემაშფოთებელი“ უწოდა. მენიეს თქმით, საქართველოში ძალიან ბევრი საქმე გამოუძიებელია და ამ პრაქტიკის ფონზე მნიშვნელოვანია, დადგინდეს, რეალურად რა პროცესები მიმდინარეობს „ომეგა ჯგუფის“ გარშემო.

„ამ საქმეს ყურადღებით დავაკვირდებით, რადგან ის ძალიან მნიშვნელოვანია. საქართველოს აქვს რეპუტაცია, რომ არის კორუფციისგან თავისუფალი ქვეყანა. მტკიცებულებები, რომლებიც ვიხილეთ, შეშფოთების საგანს წარმოადგენს საერთაშორისო გაერთიანებისთვის.

ევროკავშირი და ჩვენ, ელჩები ამ საქმეს სიფრთხილით დავაკვირდებით. ვიმედოვნებთ, რომ მისი წარმოება მოხდება გამჭვირვალედ და მივა ბოლომდე, რადგან ზოგჯერ გამოძიებები ძალიან დიდ ხანს გრძელდება დასკვნის გარეშე და ეს არ არის ის, თუ როგორ უნდა აღსრულდეს მართლმსაჯულება“,- განაცხადა ელჩმა.