პოლიტიკა

საფინანსო-საბიუჯეტო კომიტეტის თავმჯდომარის მოადგილედ რომან გოცირიძე აირჩიეს

საფინანსო-საბიუჯეტო კომიტეტის თავმჯდომარის მოადგილის თანამდებობაზე ფრაქცია „ნაციონალური მოძრაობის“ მიერ წარმოდგენილი რომან გოცირიძის კანდიდატურა ერთხმად იქნა არჩეული.

საქართველოს პარლამენტის ინფორმაციით, კომიტეტის დღევანდელ სხდომაზე, რომელსაც კომიტეტის თავმჯდომარე ირაკლი კოვზანაძე უძღვებოდა, მთავრობის მიერ საკანონმდებლო ინიციატივის წესით წარმოდგენილი კანონპროექტი „სახელმწიფო შესყიდვების შესახებ“ საქართველოს კანონში ცვლილების შეტანის თაობაზე“ პირველი მოსმენით განიხილეს.

კანონპროექტის ძირითადი დებულებების თაობაზე და მოქმედ კანონში განსახორციელებელ ცვლილებებზე სახელმწიფო შესყიდვების სააგენტოს თავმჯდომარემ ლევან რაზმაძემ ისაუბრა.

კანონში ცვლილებების შეტანის აუცილებლობა საქართველოსა და ევროკავშირს შორის დადებული ხელშეკრულებიდან გამომდინარეობს, რომლის თანახმადაც „სახელმწიფო შესყიდვების შესახებ“ საქართველოს კანონში პირდაპირ უნდა აისახოს თანასწორი მოპყრობისა და პროპორციულობის პრინციპები; შემსყიდველ ორგანიზაციებს უნდა მიეცეთ შესაძლებლობა, რომ მოთხოვნები ჩამოაყალიბონ არა მხოლოდ ტექნიკური, არამედ შესრულებისა და ფუნქციური სპეციფიკაციების საშუალებით. ამასთან, სავალდებულოა შესყიდვის მინიმალური ვადების გაზრდა, რაც ტენდერში მონაწილეობის მსურველს მისცემს სატენდერო პირობების სრულფასოვნად შეფასებისა და სატენდერო წინადადების ჯეროვნად მომზადების შესაძლებლობას. აქედან გამომდინარე, კანონის მოქმედ რედაქციაში არსებული გამარტივებული ელექტრონული შესყიდვა უქმდება და რჩება ელექტრონული შესყიდვა. ელექტრონული ტენდერისათვის დადგენილი მინიმალური 3-დღიანი ვადა კი იცვლება 7 დღით.

ცვლილებები გასაჩივრების წესსაც ეხება და სახელმწიფო შესყიდვებთან დაკავშირებული დავების განხილვის პროცესში დაინტერესებული მხარის ინსტიტუტი მკვიდრდება.

კომიტეტის წევრებმა დღევანდელ სხდომაზე სახელმწიფო აუდიტის სამსახურის 2016 წლის ფინანსური აუდიტის განმახორციელებელი საქართველოს პარლამენტის დროებითი კომისიის შექმნის მიზანშეწონილობის შესახებაც იმსჯელეს.

სხდომაზე განხილული საკითხები პარლამენტის პლენარული სხდომას წარედგინება.