სამართალი

საფინანსო კომპანია „საქართველოს“ მეანაბრეები შიმშილობის დაწყებას არ გამორიცხავენ

საფინანსო კომპანია „საქართველოს“ მიერ დაზარალებული მეანაბრეები, შიმშილობის დაწყებას აანონსებენ.

ამის შესახებ დაზარალებულებმა, გვიან ღამით, მთავარ სამმართველოსთან გამართული აქციის დროს განაცხადეს.

მეანაბრეები იმ სამი პირის გათავისუფლებას ითხოვდნენ, რომლებიც პარლამენტის წინ გამართულ აქციაზე დააკავეს.

ამასთან, ერთ-ერთმა დაკავებულმა მამუკა ტუსკაძემ შიმშილობა უკვე დაიწყო.

ამის შესახებ მისმა უფლებადამცველმა, გიორგი ლაბაძემ განაცხადა.

მისი თქმით, ტუსკაძე თავს უდანაშაულოდ მიიჩნევს.

„ჩემი დაცვის ქვეშ მყოფი თავს უდანაშაულოდ ცნობს. მას აქვს წაყენებული ბრალად წვრილმანი ხულიგნობა და პოლიციელებისადმი წინააღმდეგობის გაწევა. ამჟამად, აცხადებს შიმშილობას“,-აღნიშნა ადვოკატმა.

ერთ-ერთი დაზარალებული მეანაბრის ანა ძნელაძის თქმით, კი პარლამენტის წინ მიმდინარე აქცია სრულიად მშვიდობიან ხასიათს ატარებდა.

„არსებობს კადრები სადაც გამოდიან მეანამბრეები. არანაირი წინააღმდეგობა არ გაუწევიათ. სასამართლოში მეანაბრეები მივალთ, მხარს დავუჭერთ ჩვენს თანამებრძოლებს. თუ ასე გაგრძელდა, და პროცესები ასე განვითარდა სხვა გზა არ დაგვრჩება და მოგვიწევს რომ ვიშიმშილოთ“,-აღნიშნა ძნელაძემ.

შეგახსენებთ, რომ დაკავებულების წინააღმდეგ შსს გამოძიებას ორი მუხლით აწარმოებს: ადმინისტრაციულ-სამართალდარღვევათა კოდექსის 166-ე და 173-ე მუხლით, რაც წვრილმან ხულიგნობას და სამართალდამცველთა დაუმორჩილებლობას გულისხმობს.

მონიკა დავლიანიძე