პოლიტიკა

საერთოდ, ეს მორბენალი ინაუგურაცია ცუდ შთაბეჭდილებას ტოვებს, ეს ქალაქების ძებნა...პარიზში ჩაატარონ მაშინ, ყველაზე ადეკვატური იქნება - რამაზ საყვარელიძე

„საერთოდ, ეს მორბენალი ინაუგურაცია, ანუ სირბილის ატეხა იმიტომ, რომ ოპოზიციასთან ურთიერთობა ძნელია, ცუდ შთაბეჭდილებას ტოვებს ყველა შემთხვევაში”, – ამის შესახებ პოლიტოლოგმა რამაზ საყვარელიძემ დღევანდელ პრესკონფერენციაზე განაცხადა.

ექსპერტის თქმით, ხელისუფლებას შეეძლო, ოპოზიციასთან მოლაპარაკებების მაგიდასთან დამჯდარიყო და პრეზიდენტის ინაუგურაცია მშვიდად ჩაეტარებინა.

„საერთოდ, ეს მორბენალი ინაუგურაცია, ანუ სირბილის ატეხა იმიტომ, რომ ოპოზიციასთან ურთიერთობა ძნელია, ცუდ შთაბეჭდილებას ტოვებს ყველა შემთხვევაში. მაგალითად, იმისთვის, რომ ინაუგურაცია ჩატარდეს, ხელისუფლებას შეიძლებოდა, ეთქვა, რომ კი, ვსხდებით მოლაპარაკების მაგიდასთან, დამსხდარიყვნენ, ორი დღე მსხდარიყვნენ, ჩაეტარებინათ ინაუგურაცია და მერე წასულიყვნენ. იმიტომ, რომ როცა დარბიხარ, ესე იგი, მაინც გეშინია მისი, ვინც მოგდევს, ამიტომ არ მგონია, ეს ქალაქების ძებნა… ნუ, პარიზში ჩაატარონ მაშინ, ყველაზე ადეკვატური იქნება“, – განაცხადა საყვარელიძემ.

ჯერ კიდევ უცნობია, სად გაიმართება ახალარჩეული პრეზიდენტის ინაუგურაცია.

როგორც სალომე ზურაბიშვილმა განმარტა, მიმდინარეობს ამ საკითხზე მსჯელობა და რამდენიმე ვარიანტი განიხილება.