პოლიტიკა

საჯარო სამსახურის ბიურო უნდა დაინტერესედეს 3 თანამდებობის პირის საქმით, რომლებიც შეუთავსებელ საქმიანობას ეწევა - „საერთაშორისო გამჭვირვალობა - საქართველო“

„საერთაშორისო გამჭვირვალობა - საქართველომ“ მარტვილის, მესტიის, ფოთისა და ხობის მუნიციპალიტეტების თანამდებობის პირთა შესახებ ინფორმაცია გამოაქვეყნა. ორგანიზაციის თქმით, მათ არასრულად შეავსეს დეკლარაცია და არ მიუთითეს ინფორმაცია საკუთარი ან/და ოჯახის წევრთა კომერციულ საქმიანობაში მონაწილეობის შესახებ და ასევე იმაზე, რომ ეწევიან თანამდებობასთან შეუთავსებელ საქმიანობას.

„საერთაშორისო გამჭვირვალობის“ თქმით, კვლევის ფარგლებში 100-ზე მეტი დეკლარაცია იყო შესწავლილი, რომელთაგან 7 შემთხვევაში დეკლარაციის არასრულად შევსების, 3 შემთხვევაში კი შეუთავსებელი საქმიანობის ფაქტი გამოვლინდა, რაც საჯარო სამსახურის ბიუროს სათანადო დაინტერესების საგანი უნდა გახდეს.

მარტვილის მუნიციპალიტეტის მერ ალექსანდრე გრიგალავას 2017 წლის ოქტომბერში შევსებულ დეკლარაციაში არ აქვს აღნიშნული, რომ მისი შვილი ლაშა გრიგალავა ფლობს წილებს და არის დირექტორი შემდეგ კომპანიებში:

შპს “ლაგი ჯგუფი” 50%-იანი წილის მფლობელი და დირექტორი;

შპს “გეომარტ”33,3%-იანი წილის მფლობელი;

შპს “ლაგი კაპიტალი” 25%-იანი წილის მფლობელი;

შპს “დიდი მეგობრობა” 11,5%-იანი წილის მფლობელი.

მარტვილის საკრებულოში ფრაქცია „ერთიანი ნაციონალური მოძრაობის“ თავმჯდომარეს ზაალ გოროზიას 2017 წლის მაისში შევსებულ დეკლარაციაში არაა მითითებული, რომ იგი არის “ჯეო ქარგოს” 100%-იანი წილის მფლობელი.

მესტიის საკრებულოს თავმდჯომარის მოადგილეს ზაურ ჩართოლანს 2017 წლის 5 სექტემბერს წარდგენილ დეკლარაციაში არ აქვს აღნიშნული, რომ:

ის არის შპს „ტურისტულ ალპინისტთა კლუბი მთის ლეგენდა“–ის 12.5%-იანი წილის მფლობელი ;

ჩართოლანი კოოპერატივ “რკ სპადრიანი”–ის დირექტორია მესტიის მერიის ეკონომიკის განვითარების, სტატისტიკისა და ქონების მართვის სამსახურის უფროსს, დავით რატიანს 2017 წლის სექტემებრში შევსებულ დეკლარაციაში არ აქვს მითითებული, რომ მისი შვილი, დავით რატიანი არის შპს “ლაიკ ტურ ჯორჯიას” 50%-იანი წილის მფლობელი და შპს “სტანდარტ გრუპ გეორგიას” დირექტორი.

მესტიის მერიის საფინანსო სამსახურის უფროსის თეიმურაზ ნავერიანს 2017 წლის სექტემბერში წარდგენილ დეკლარაციაში არ აქვს აღნიშნული, რომ მისი მეუღლე ნინო ნიგურიანი არის შპს “გაბრიელის” 33%-იანი წილის მფლობელი.

გარდა ამისა, დეკლარაციის შევსების შემდეგ ნავერიანი გახდა შპს “ფინანსისტის” 34%-იანი წილის მფლობელი და დირექტორი, რაც წარმოადგენს საჯარო სამსახურში ინტერესთა შეუთავსებლობისა და კორუფციის შესახებ კანონის მოთხოვნათა დარღვევას, რომლის თანახმადაც, თანამდებობის პირს არ აქვს უფლება, იყოს სამეწარმეო დაწესებულების ხელმძღვანელი.

ფოთის მერიის ჯანმრთელობის, სოციალური უზრუნველყოფის, ვეტერანთა, დევნილთა, გენდერული თანასწორობისა და დასაქმების სამსახურის უფროსს მაია მაკალათიას 2017 წლის ოქტომბერში შევსებულ დეკლარაციაში არ აქვს მითითებული, რომ იგი არის შპს M.M.M. 100%-იანი წილის მფლობელი და დირექტორი.

ხობის მერიის ადმინისტრაციული სამსახურის უფროს ზვიად ბუკიას 2017 წლის სექტემბერში წარდგენილ დეკლარაციაში არ აქვს აღნიშნული, რომ ის ფლობს შპს “ფლორა და ფაუნას” 25%-იან წილს.