პოლიტიკა

საჯარო მოხელეებისგან სალომე ზურაბიშვილისთვის ხმის მიცემას მოითხოვენ, რიგ შემთხვევაში ადგილი ჰქონდა სამსახურიდან გათავისუფლების მუქარას - ISFED

არასამთავრობო ორგანიზაციამ „სამართლიანი არჩევნებისა და დემოკრატიის საერთაშორისო საზოგადოება" (ISFED) საქართველოს პრეზიდენტის არჩევნების მეორე ტურის წინასაარჩევნო მონიტორინგის შუალედური ანგარიში წარადგინა, რომელშიც მიმოხილულია 29 ოქტომბრიდან 19 ნოემბრამდე პერიოდი.

ანგარიშში აღნიშნულია, რომ პირველ ტურთან შედარებით, მეორე ტურის წინასაარჩევნო გარემო უფრო მკვეთრი პოლარიზებითა და ნეგატიური საარჩევნო კამპანიით ხასიათდება, ასევე გაზრდილია აგრესიული რიტორიკა.

მონიტორინგის პერიოდში გამოიკვეთა ზეწოლა/მუქარის 40; საპრეზიდენტო კანდიდატისადმი მუქარის 1; სამსახურიდან სავარაუდოდ პოლიტიკური ნიშნით გათავისუფლების 3; ფიზიკური დაპირისპირების 5; ამომრჩევლის სავარაუდო მოსყიდვის 13; ადმინისტრაციული რესურსის გამოყენების 14; წინასაარცევნო კამპანიისთვის ხელის შეშლის 2; სააგიტაციო მასალების დაზიანების 6 და დამკვირვებლის საქმიანობისთვის ხელშეშლის 1 შემთხვევა.

ორგანიზაციის ინფორმაციით, ფართოდ გავრცელებული სახე მიიღო ზეწოლისა და მუქარის ფაქტებმა. ანგარიშის თანახმად, სხვადასხვა მუნიციპლაიტეტის ხელმძღვანელები თანამშრომლებს აიძულებენ, სალომე ზურაბიშვილს მისცენ ხმა.

„ISFED-ის ინფორმაციით, ზეწოლა ხორციელდება სხვადასხვა მუნიციპალიტეტის როგორც საჯარო მოხელეებსა და მუნიციპალიტეტის ორგანოებში, ასევე კერძო სექტორში დასაქმებულ პირებსა და სხვა მოწყვლად ამომრცეველზე. სხვადასხვა მუნიციპალიტეტის ხელმძღვანელი თანამდებობის პირები სისტემატურად მართავენ შეხვედრებს საჯარო მოხელეებთან, რა დროსაც მათგან სალომე ზურაბიშვილის მხარდაჭერას მოითხოვენ. რიგ შემთხვევაში ადგილი ჰქონდა სამსახურიდან გათავისუფლების მუქარას“, - წერია ანგარიშში.

დოკუმენტის თანახმად, აღნიშნული ფაქტები ამომრჩეველზე ზეწოლა-მუქარის გარდა ასევე წარმოადგენს ადმინისტრაციული რესურსის გამოყენებასაც, რადგან უმრავლეს შემთხვევაში მაღალი თანამდებობის პირები ამ გზით ბოროტად იყენებენ თავის უფლებამოსილებას.

ყურადღება გამახვილებულია ფიზიკური დაპირისპირების ფაქტებზეც. ანგარიშის თანახმად, პირველი ტურის წინასაარჩევნო კამპანიისგან განსხვავებით მეორე ტურის წინ ფიზიკური დაპირისპირების შემთხვევები გამოვლინდა. კერძოდ, ოპოზიციური პარტიის აქტივისტებსა და მათ მხარდამჭერებზე ფიზიკური ძალადობის 4 შემთხვევა, ერთ შემთხვევაში კი პირს ფიზიკურად გრიგოლ ვაშაძისთვის ხმის არმიცემის გამო დაუპირისპირდნენ.

ანგარიშის მიხედვით, პირველი ტურისგან განსხვავებით მეორე ტურის წინ დაფიქსირდა პოლიტიკური ნიშნით სამსახურიდან გათავისუფლების ფაქტები.

გარდა ამისა, საანგარიშო პერიოდში კვლავ დაფიქსირდა საარჩევნო კამპანიისთვის ხელის შეშლის ფაქტები როგორც სალომე ზურაბიშვილის, ასევე გრიგოლ ვაშაძის კამპანიის მიმდინარეობისას. ანგარიშში აღნიშნულია, რომ ხელშეშლის გარდა სალომე ზურაბიშვილს შეურაცხყოფაც მიაყენეს.