პოლიტიკა

საჯარო ინფორმაციაზე ხელმისაწვდომობის შეზღუდვაში, როგორც ჩანს, იუსტიციის სამინისტრო „ლიდერობს“ - დიმიტრი ლორთქიფანიძე

„დემოკრატიული პარტიის“ წევრი, დიმიტრი ლორთქიფანიძე გამოეხმაურა თბილისის საქალაქო სასამართლოს გადაწყვეტილებას, რომელმაც იუსტიციის მინისტრი თეა წულუკიანი და მისი 10 საჯარო სამართლის იურიდიული პირის ხელმძღვანელი საჯარო ინფორმაციის გაუცემლობის გამო სამართალდამრღვევებად ცნო. პოლიტიკოსის თქმით, საჯარო ინფორმაციაზე ხელმისაწვდომობის შეზღუდვა ამჟამინდელ ხელისუფლებას ახასიათებს.

„საჯარო ინფორმაციაზე ხელმისაწვდომობის შეზღუდვა დღევანდელი ხელისუფლების უპასუხისმგებლობის სისტემური მახასიათებელია და ამ კუთხით, როგორც ჩანს, იუსტიციის სამინისტრო „ლიდერობს““, -განაცხადა ლორთქიფანიძემ.

ლორთქიფანიძემ აღნიშნა, რომ მისმა პარტიამ 2017 წლის აპრილიდან სთხოვს წულუკიანის უწყებას, მიაწოდოს ინფორმაცია უცხოელ მოქალაქეებზე მიწის გასხვისების შესახებ, თუმცა პასუხი დღემდე არ მიუღია.

„აღსანიშნავია, რომ „დემოკრატიულმა მოძრაობამ“ 2017 წლის 4 აპრილიდან არაერთგზის მიმართა იუსტიციის სამინისტროს წერილობით, 2012-2017 წლებში, უცხო ქვეყნის მოქალაქეებისთვის მიწაზე საკუთრების უფლების რეგისტრაციისა და მათზე გასხვისებული მიწის სავარგულების საერთო ფართობის მითითების მოთხოვნით, მაგრამ დღემდე პასუხი აღნიშნულთან დაკავშირებით არ მიგვიღია. შესაბამისად, ვთვლით, რომ საჯარო რეესტრის სააგენტოს თავმჯდომარეც იმავე ხვედრს უნდა იზიარებდეს, რასაც ქალბატონი მინისტრი და დანარჩენი 10 სსიპ-ის ხელმძღვანელობა“, - განაცხადა ლორთქიფანიძემ.

შეგახსენებთ, თბილისის საქალაქო სასამართლომ დააკმაყოფილა სახალხო დაცმველის მიმართვა და იუსტიციის მინისტრი თეა წულუკიანი და მისი 10 საჯარო სამართლის იურიდიული პირის ხელმძღვანელი სამართალდამრღვევებად ცნო. ომბუდსმენი ედავებოდა მისი რეკომენდაცვიის უგულებელყოფას, რომელიც ეხებოდა საჯარო ინფორმაციაზე ხელმისაწვდომობის შეზღუდვის ფაქტს არასამთავრობო ორგანიზაცია „ინფორმაციის თავისუფლების განვითარების ინსტიტუტისთვის“.
საქალაქო სასამართლო მხოლოდ სიტყვიერი შენიშვნით შემოიფარგლა.