სამართალი

სად და რა ვითარებაში მიიღო ფიზიკური დაზიანებები ირაკლი ხოფერიამ - საიამ გაასაჩივრა პროკურატურის გადაწყვეტილება, რომლის მიხედვით, მან შეწყვიტა გამოძიება ცემის ფაქტზე

„ახალგაზრდა იურისტთა ასოციაციამ“ გაასაჩივრა პროკურატურის დადგენილება ირაკლი ხოფერიას მიმართ განხორციელებული წამების საქმეზე გამოძიების შეწყვეტისა და დაზარალებულის სტატუსის მოხსნის შესახებ. საიას თქმით, ეს გადაწყვეტილება დაუსაბუთებელია და უპასუხოდ ტოვებს კითხვას, სად და რა ვითარებაში მიიღო ფიზიკური დაზიანებები ირაკლი ხოფერიამ.

ირაკლი ხოფერია 2017 წლის 16 თებერვალს სავარაუდოდ პოლიციის თანამშრომლებმა უსაფუძვლოდ გადაიყვანეს პოლიციის განყოფილებაში და მასზე იძალადეს. ირაკლი ხოფერიას განმარტებით, მას სთხოვდნენ, ეღიარებინა დანაშაული, რომელიც არ ჩაუდენია, ემუქრებოდნენ ნარკოტიკული ნივთიერების ჩადებით და პარალელურად აყენებდნენ ფიზიკურ შეურაცხყოფას. მას შემდგომ, რაც გაირკვა, რომ ირაკლი ხოფერია შეცდომით, სხვა პირის ნაცვლად დააკავეს, იგი გაათავისუფლეს. ჩატარებული სამედიცინო შემოწმების შედეგად დადგინდა, რომ ხოფერიას სხვადასხვა ტიპის დაზიანება აღენიშნებოდა.

საიას ინფორმაციით, გამოძიება ამ საქმეზე ხარვეზებით მიმდინარეობდა, რადგან თავიდან პროკურატურა უარს ამბობდა ხოფერიასთვის დაზარალებულის სტატუსის მინიჭებაზე. ამის აღიარება დაზარალებულმა 2017 წლის 2 მაისის სასამართლოს გზით მოიპოვა. ორგანიზაციის თქმით, ხოფერიამ ამოიცნო პოლიციელი, ვინც მას ფიზიკურად გაუსწორდა, თუმცა გამოძიების მიმდინარეობისას პასუხისგებაში არავინ მიცემულა.

ანა მებურიშვილი