პოლიტიკა

საჭიროების შემთხვევაში, მზად ვართ, დავეხმაროთ მთავრობას ე.წ. ფარული მოსმენების კანონზე - აშშ-ის ელჩი

საქართველოში აშშ-ის ელჩის, იან კელის განცხადებით, ამერიკული მხარე საჭიროების შემთხვევაში დაეხმარება საქართველოს მთავრობას ე.წ. ფარული მოსმენების კანონთან დაკავშირებით.

„ჩვენ დიდი ყურადღებით ვაკვირდებოდით ამ პროცესს. ამ საკითხში მთავარია, არსებობდეს ზედამხედველობა უსაფრთხოების სამსახურებსა და კანონის აღმასრულებელ სამსახურებზე. თუკი ამ პროცესში მთავრობას სჭირდება რამე სახის დახმარება ან რეკომენდაციები, ჩვენ მზად ვართ. მთავარია, არსებობდეს საპარლამენტო ან სასამართლო ზედამხედველობა ასეთ საკითხებზე“,- აღნიშნა იან კელიმ.
შეგახსენებთ, რომ 1-ლ მარტს პარლამენტმა მესამე მოსმენით მხარი დაუჭირა უმრავლესობის მიერ შემუშავებულ საკონსტიტუციო ცვლილებათა პაკეტს ე.წ. ფარული მოსმენების შესახებ.

აღნიშნულ საკანონმდებლო პაკეტს პრეზიდენტმა 20 მარტს ვეტო დაადო. მიზეზად მან დაასახელა, რომ ფარული მოსმენების განმახორციელებელი ორგანო ისევ სუს-ის კონტროლის ქვეშ იქნება, აგრეთვე მან ყურადღება გაამახვილა იმ ფინანსურ ვალდებულებებზე, რაც ეს კანონი სატელეკომუნიკაციო კომპანიებს აკისრებს. 22 მარტს პარლამენტმა პრეზიდენტის ვეტო დაძლია, რის შემდეგ ქვეყნის პირველმა პირმა ამ კანონპროექტს ხელი მოაწერა.

ე.წ. ფარული მოსმენის კანონპროექტზე მუშაობა მას შემდეგ გახდა საჭირო, რაც 2016 წლის 14 აპრილს საკონსტიტუციო სასამართლომ ფარული მოსმენების არსებული წესი არაკონსტიტუციურად ცნო. სასამართლომ პარლამენტს დააკისრა ცვლილებების შეტანის ვალდებულება 2017 წლის 31 მარტამდე.

ანა მებურიშვილი