პოლიტიკა

საბოლოო შედეგების შემაჯამებელი ოქმის გამოქვეყნების შემდეგ პრეზიდენტი პარლამენტის პირველ სხდომას მოიწვევს

ცენტრალური საარჩევნო კომისიის მიერ საბოლოო შედეგების შემაჯამებელი ოქმის გამოქვეყნების შემდეგ, საქართველოს პრეზიდენტი მოიწვევს პარლამენტის პირველ სხდომას, რომელსაც თავად გახსნის და პარლამენტს სიტყვით მიმართავს.

ინფორმაცია ამის შესახებ მედიის წარმომადგენლებს პრეზიდენტის ადმინისტრაციაში გამართულ ბრიფინგზე პრეზიდენტის პრესსპიკერმა, ეკა მიშველაძემ მიაწოდა.

როგორც მიშველაძემ აღნიშნა, ამ ეტაპზე მნიშვნელოვანია, არჩევნების განმავლობაში გამოვლენილ დარღვევებზე დროული და ადეკვატური რეაგირება.

,,არჩევნები დასრულდა. პრეზიდენტმა საარჩევნო პროცესი თავად შეაჯამა და მოგახსენათ საკუთარი აზრი. ამ ეტაპზე, მნიშვნელოვანია დროული და ადეკვატური რეაგირება ყველა დარღვევაზე, რაც გამოვლინდა არჩევნების განმავლობაში. ეს მნიშვნელოვანია როგორც პოლიტიკური პროცესის სამართლიანობისთვის, ასევე ზოგადად საარჩევნო სისტემის სანდოობისთვის და გარდა ამისა, მომავალი არჩევნებისთვის, რომ მოხდეს ხარვეზების აღმოფხვრა და არჩევნების უკეთ ორგანიზება.

ასევე, მინდა გაცნობოთ, რომ ცენტრალური საარჩევნო კომისიის მიერ საბოლოო შედეგების შემაჯამებელი ოქმის გამოქვეყნების შემდეგ, საქართველოს პრეზიდენტი მოიწვევს პარლამენტის პირველ სხდომას, რომელსაც თავად გახსნის და პარლამენტს სიტყვით მიმართავს. რაც შეეხება აჭარის ავტონომიურ რესპუბლიკას, უსკოს მიერ შემაჯამებელი ოქმის გამოქვეყნების შემდეგ, პრეზიდენტი აჭარის უმაღლესი საბჭოს პირველ სხდომას დანიშნავს’’, - განაცხადა ეკა მიშველაძემ.