პოლიტიკა

საბანკო სესხებთან მიმართებაში მიმდინარე პროცესები მოსახლეობისთვის სერიოზული დარტყმა იყო- გიორგი მარგველაშვილი

გიორგი მარგველაშვილის განცხადებით, საზოგადოებაში არსებული უთანასწორობის ფონზე, საბანკო სესხებთან მიმართებაში მიმდინარე პროცესები მოსახლეობისთვის სერიოზული დარტყმა იყო.

პარლამენტში გამოსვლილსას მან ეროვნულ ბანკს მადლობა გადაუხადა, რომელიც, მისი თქმით, ყველა ღონეს ხმარობს, რათა ამ მიმართულებით სტაბილური და განჭვრეტადი იყოს ვითარება.

„აქვე მინდა, მადლობა ვუთხრა ეროვნულ ბანკს, რომელიც ყველა ღონეს ხმარობს, რათა ამ მიმართულებით სტაბილური და განჭვრეტადი იყოს ვითარება. მცირე და საშუალო ბიზნესი ჯერ კიდევ ძალიან მცირე მოცულობისაა ჩვენს ქვეყანაში და ჯერ კიდევ დიდი ბიზნესის ჩრდილშია. მაგრამ მთავარი შემკვრელი ამ პრობლემატიკის არის დასაქმება”, – აღნიშნა პრეზიდენტმა.

პრეზიდენტმა ქვეყანაში არსებულ უმუშევრობის პრობლემასაც გაუსვა ხაზი.

„არ მინდა მე სტატისტიკურ დებატებში შესვლა – რამდენი უმუშევარი და რამდენი დასაქმებულია, მაშინ როცა სტატისტიკა აი ასეთ მაგალითად განსაზღვრებას ეფუძნება, რომ წინა შვიდი დღის განმავლობაში სულ მცირე ერთი საათით მაინც მუშაობდა შემოსავლის მიღების მიზნით, ეხმარებოდა უსასყიდლოდ, ან ფორმალურად ირიცხებოდა მომუშავედ. აი ამ ფორმულიდან გამომდინარე დგინდება თურმე უმუშევრობა საქართველოში. ჩემი მეგობარი ზურაბ ჟვანია ამბობდა ხოლმე, რომ ყველაზე კარგი სტატისტიკა მაცივარია. გამოაღებ მაცივარს ოჯახში და მიხვდები, როგორი ეკონომიკური მდგომარეობაა. დღეს ჩვენ გვაქვს ისეთი მდგომარეობა დასაქმების თვალსაზრისით, რომ ჩვენი მოქალაქეები მზად არიან, რეალურად სიცოცხლის მოსპობის რისკის მიუხედავად, არ დაკარგონ სამსახური და ყოველდღე გადიან სამსახურში, სადაც სიკვდილი ემუქრება. აქ მე არ ვლაპარაკობ შრომის უსაფრთხოებაზე და იმ მდგომარეობაზე, რომელიც არის დასაქმების თვალსაზრისით”, – განაცხადა მარგველაშვილმა.

დღეს, საქართველოს პრეზიდენტი პარლმენტში თავის მეხუთე და პრეზიდენტის რანგში ბოლო მოხსენებით წარსდგა.