პოლიტიკა

სააპელაციო სასამართლოს წევრი გახდება მხოლოდ ის მოსამართლე, რომელიც პირველი ინსტანციის სასამართლოში 3-4 წელი მუშაობდა - ვახტანგ ხმალაძე ახალ ინიციატივაზე

ექსპერტი ვახტანგ ხმალაძის განცხადებით, საკონსტიტუციო კომისიის დღევანდელ შეხვედრაზე ის შესთავაზებს მოსამართლეთა არჩევის მისეულ ვარიანტს. ხმალაძის აზრით, ეს ინიციატივა ხელს შეუწყობს მოსამართლეთა პროფესიულ წინსვლას.

„მე ვფიქრობ, რომ დავსვა მოსამართლეთა კარიერული წინსვლის საკითხი, რაც გულისხმობს იმას, რომ სააპელაციო სასამართლოს წევრად შეიძლება დაინიშნოს მხოლოდ ის პირი, რომელიც პირველი ინსტანციის სასამართლოში მოსამართლედ მუშაობდა სულ ცოტა 3-4 წლის განმავლობაში. ასევე უნდა დადგეს საკითხი უზენაესი სასამართლოს წევრების არჩევის შესახებ“, - განაცხადა ხმალაძემ საკონსტიტუციო კომისიის სამუშაო შეხვედრის დაწყების წინ.

დღეს საკონსტიტუციო კომისიაში იმსჯელებენ სასამართლო ხელისუფლების ფორმირების შესახებ, კერძოდ, რა კრიტერიუმს უნდა აკმაყოფილებდეს და როგორ უნდა დაინიშნოს მოსამართლე.

ანა მებურიშვილი