სამართალი

სააპელაციო სასამართლომ „თავისუფალი საქართველოს“ წევრის დაკავება უკანონოდ სცნო

სააპელაციო სასამართლომ დააკმაყოფილა „თავისუფალი საქართველოს“ მოთხოვნა და კარლოს რაისიანის სარჩელზე ახალციხის სასამართლოს მიერ გამოტანილი გადაწყვეტილება ბათილად სცნო.

აღნიშნულის შესახებ საუბარია ,,თავისუფალი საქართველოს’’ განცხადებაში:

,,2017 წლის 1-ლ აპრილს „თავისუფალი საქართველოს“ ახალქალაქის კომიტეტის თავმჯდომარის, პარლამენტის ყოფილი წევრის - მელიქ რაისიანის შვილები - აშოტ და კარლოს რაისიანები სუს-ის და სამცხე-ჯავახეთის შს სამმართველოს მიერ ჩატარებული ერთობლივი ოპერაციის დროს გაიტაცეს ახალქალაქიდან ყოველგვარი ბრალდების და დაკავების პროცედურების გარეშე. ახალციხეში ძალოვანი სტრუქტურების წარმომადგენლები ემუქრებოდნენს ჯერ მათ, ხოლო შემდეგ მათი ოჯახის წევრებს და ურჩევდნენ, რომ თუკი საქართველოში მშვიდი ცხოვრება სურთ „ჭკვიანად უნდა მოიქცნენ“.

დაკავებული კარლოს რაისიანი ახალციხის წინასწარი დაკავების იზოლატორში აწამეს ელექტროშოკით. 2 აპრილს დაკავებულები წარუდგინეს სასამართლოს, რომლებმაც სამართალდარღვევის არარსებობის გამო აშოტ რაისიანი გაამართლა, ხოლო კარლოს რაისიანი დააჯარიმა 250 ლარით „წინააღმდეგობის გაწევისთვის“ (პოლიცია 2-ვე შემთხვევაში ითხოვდა დაპატიმრებას).

პარტიამ კარლოს რაისიანის მიმართ გამოტანილი უკანონო გადაწყვეტილება თბილისის სააპელაციო სასამართლოში გაასაჩივრა. 22 მაისს სააპელაციო სასამართლომ „თავისუფალი საქართველოს“ მოთხოვნა დააკმაყოფილა და ახალციხის სასამართლოს გადაწყვეტილება ბათილად სცნო.’’- ნათქვამია პარტიის განცხადებაში.