სამართალი

სააპელაციო სასამართლომ მოთხოვნა მუსტაფა ემრე ჩაბუქის თურქეთში ექსტრადიციის გაუქმებასთან დაკავშირებით უნდა დააკმაყოფილოს - ადვოკატი

„დემირელის“ კოლეჯის ყოფილი მენეჯერის, მუსტაფა ემრე ჩაბუქის ოჯახის ადვოკატის, სოსო ბარათაშვილის განცხადებით, სააპელაციო სასამართლომ დაცვის მხარის მოთხოვნა ჩაბუქის თურქეთში ექსტრადიციის გაუქმებასთან დაკავშირებით უნდა დააკმაყოფილოს.

სოსო ბარათაშვილის თქმით, თურქეთში ადამიანის უფლებების დაცვის კუთხით ბევრი პრობლემაა, რის გამოც შესაძლოა, ბრალდებული ექსტრადიციის შემთხვევაში წამებისა და არაადამიანური მოპყრობის მსხვერპლი გახდეს.

როგორც ადვოკატი ამბობს, მათ მიერ მომზადებული სარჩელის მიხედვით, სააპელაციო სასამართლომ ბრალდებულის თურქეთში ექსტრადიცია უნდა გააუქმოს.

ცნობისათვის, თბილისის სააპელაციო სასამართლოში მუსტაფა ემრე ჩაბუქის საქმეზე დღეს ადმინისტრაციული პროცესი გაიმართება.

ადვოკატების მოთხოვნა უცვლელია – ბათილად იქნას ცნობილი პირველი ინსტანციის სასამართლოს მიერ მიღებული გადაწყვეტილება, მუსტაფა ემრე ჩაბუქისა და მისი ოჯახის წევრებისთვის ლტოლვილის სტატუსის მიუნიჭებლობის თაობაზე.

ადვოკატები დღევანდელ პროცესზე კიდევ ერთხელ წარმოადგენენ იმ მტკიცებულებებს, რომლების საქალაქო სასამართლოსა და დევნილთა სამინისტროს წარუდგინეს.

მუსტაფა ემრე ჩაბუქი გასული წლის მაისში დააკავეს. ამის მიზეზი თურქული მხარის მოთხოვნა იყო, რომელიც ამტკიცებს, რომ ჩაბუქი ფეთჰულა გიულენის ტერორისტული ორგანიზაციის საქმიანობას უწყობდა ხელს. თბილისის საქალაქო სასამართლომ ჩაბუქს სამთვიანი საექსტრადიციო პატიმრობა მიუსაჯა.

ჩაბუქის წინასაექტრადიციო პერიოდი თებერვალში იწურება.