პოლიტიკა

სააკაშვილს სურს, 2011 წლის 26 მაისის მსგავსი სასაკლაო მოაწყოს უკრაინაში, გადასცეს რუსეთს და ლაჩრულად გაიქცეს - ანტონ გერაშენკო

უკრაინის შინაგან საქმეთა მინისტრის მრჩევლისა და უმაღლესი რადას დეპუტატის, ანტონ გერაშენკოს განცხადებით, მიხეილ სააკაშვილისთვის უკრაინის მოქალაქეობის მინიჭება შეცდომა იყო. ამის შესახებ გერაშენკომ ფეისბუკის საკუთარ გვერდზე დაწერა.

დეპუტატის მტკიცებით, ოდესის ყოფილ გუბერნატორს სურს, უკრაინაში გაიმეოროს 2011 წლის 26 მაისის ღამის დარბევა.

„საქართველოში სააკაშვილის ხელისუფლება იდგა ძალადობასა და მუდმივ ტყუილზე. მისთვის უკრაინის მოქალაქეობის მინიჭება შეცდომა იყო, სააკაშვილი [საქართველოსთვის] იყო ის, რაც იანუკოვიჩი უკრაინისთვის - ტირანი და არეულობის მომწყობი. მისი მეთოდები არაფრით არ განსხვავდება იანუკოვიჩის, პშონკასა და ზახარჩენკოს მეთოდებისგან.

ბევრის მსგავსად მეც თავიდან ვცდებოდი სააკაშვილის მიმართ მისი დანიშვნის პირველ თვეებში. თუმცა მოგვიანებით მივხდი, რომ ის სერიოზულ საფრთხეს წარმოადგენს უკრაინისთვის და მისი ოპონენტი გავხდი.

მე შემიძლია ჩემი შეცდომების აღიარება და მოვუწოდებ სხვა უკრაინელ პოლიტიკოსებს, ვისაც სურთ უკრაინის აყვავება, იგივე გააკეთონ.

ვაქვეყნებ ქართული ოპოზიციის 2011 წლის 25 მაისს ჩატარებული მიტინგების ფოტოს. იმ საღამოს ქართული პოლიციის უკანონო ქმედებების გამო დაიღუპა სამი ადამიანბი, დაშავდა 40-ზე მეტი პირი.

ახლა კი სააკაშვილს სურს, იგივე სასაკლაო მოაწყოს უკრაინაში, გადასცეს რუსეთს და ლაჩრულად გაიქცეს?

იქნებ, „სააკაშვილის რეფორმის“ შედეგების ნახვისას ვიღაც უკრაინელებს, ვინც ცინიკური ტყუილის ქვეს მოექცნენ, აეხილოთ თვალები“, -დაწერა გერაშენკომ.

შეგახსენებთ, 2011 წლის 26 მაისს შინაგან საქმეთა სამინისტროს სპეციალურმა ქვედანაყოფებმა რუსთაველის გამზირზე „სახალხო კრებისა“ და „დემოკრატიული მოძრაობის“ მიერ ორგანიზებული საპროტესტო აქცია დაშალეს. დემონსტრანტები მაშინდელი ხელისუფლების გადადგომას მოითხოვდნენ.

არსებული ინფორმაციით, დააკავეს 100-მდე პირი, მიტინგის დაშლის დროს გარდაიცვალა ორი ადამიანი, მათ შორის ერთი პოლიციელი, ასევე დაშავდა ათობით პირი.

რაც შეეხება მიხეილ სააკაშვილს, 10 სექტემბერს 20 საათზე მან თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.

ანა მებურიშვილი