პოლიტიკა

სააკაშვილი თანაპარტიელებზე - ამ ახირებულ ერთ-ორ პერსონაჟთან არაფერი საერთო არ მინდა მქონდეს

ყოფილი პრეზიდენტი მიხეილ სააკაშვილი ,,ფესიბუქის“ გვერდზე ინტერვიუს აქვეყნებს, სადაც ნაციონალური მოძრაობის რამოდენიმე ლიდერის შეცდომებზე საუბრობს და აღნიშნავს, რომ არ უნდა ამ ადამიანებთან საერთო ჰქონდეს.

სააკაშვილის თქმით, ისინი არ უსმენენ საკუთარ მხარდამჭერებს და პრაქტიკულად, პარტიას გამოუწერეს დამარცხება. მიხეილ სააკაშვილის თქმით, იმის მაგივრად რომ ეს ადამიანები ხალხს რაზმავდნენ და ბრძოლისკენ მოუწოდებდნენ, ისინი მისკენ იშვერენ ხელს.

,,დაიწყეს უაზრო ლაპარაკი - სააკაშვილი კერპი უნდა იყოს იყო თუ არაო? რა შუაშია სააკაშვილი? რა შუაში ვარ ამ დებატებში მე? აქ საუბარი სხვა რაღაცაზეა - ივანიშვილმა გააყალბა არჩევნები და დედის რძესავით შევირგეთ ეს გაყალბება.

ვურჩევდი არ წასულიყვნენ მეორე ტურზე, იმიტომ, რომ ორმაგი იმედგაცრუება იქნებოდა და არა, ერთ მანდატს მაინც წავგლიჯავთო და რა თქმა უნდა მოხდა ის, რასაც ვვარაუდობდით, ვერც ერთი მანდატი ვერ აიღეს და ამან გამოიწვია კიდევ უფრო მეტი დემორალიზება. ამის შემდეგ კიდევ აგრძელებენ უაზრო ლაპარაკს (ის ერთი-ორი ტიპაჟი), თითქოს არსებობს 8-10 წლიანი ციკლი და უნდა დაველოდოთ კიდევ რამდენიმე წელიწადში როგორ გააყალბებს არჩევნებს ივანიშვილი.

„ნაციონალური მოძრაობა“ ყოველთვის ემზადებოდა ასეთი ხრიკებისთვის, ყოველთვის ჰქონდა გამზადებული ბრძოლის ვარიანტი და იმის მაგივრად, რომ ხალხს ვრაზმავდეთ, იმის მაგივრად, რომ ბრძოლისკენ და შეურიგებლობისკენ მოვუწოდებდეთ, სადღაც ხელებს ვიშვერთ, თურმე პრობლემა არის სააკაშვილის - მათ პრობლემა სააკაშვილთან კი არ აქვთ, პრობლემა აქვთ საკუთარ ხალხთან და პირველ რიგში ჩვენს მრავალრიცხოვან მხარდამჭერებთან - 600 00 ამომრჩეველთან.

ვინც არ უსმენს ჩვენს აქტივისტებს, ვინც დაუშვა ამდენი შეცდომა, ვინც პრაქტიკულად, გამოგვიწერა დამარცხებები არამხოლოდ წარსულში, არამედ, წინასწარ აქვთ გამოცხადებული მომავალში - ამ ახირებულ ერთ-ორ პერსონაჟთან, მათ შორის პარტიის ხელმძღვანელობის შიგნით, ხალხმა მინდა იცოდეს, მე არაფერი საერთო მინდა მქონდეს. მე უკრაინაში დიდ საქმეში ვარ, მაგრამ ერთი წუთით არ ვწყვეტ ჩვენს ქვეყანაზე ფიქრს. მე დავეხმარები ჩვენ ხალხს, აქტივისტებს, ჩვენ აუცილებლად გავიმარჯვებთ“,- განაცხადა სააკაშვილმა.

მარი ნამგალაძე