პოლიტიკა

რუსული მედიის ცნობით, აზერბაიჯანული ოპოზიციური მოძრაობა თბილისში 21 იანვარს ყრილობის გამართვას აპირებს

აზერბაიჯანული ოპოზიციური მოძრაობა „რესპუბლიკური ალტერნატივა“ 21 იანვარს თბილისში ყრილობის გამართვას გეგმავს. ამის შესახებ რუსული მედიასაშუალება „Взгляд“-ი წერს.

მისივე ინფორმაციით, ყრილობაში 100 დელეგატი მიიღებს მონაწილეობას.

„აღნიშნული მოძრაობის სათავეში დგას 2014 წელს 7 წლით გასამართლებული ილგარ მამედოვი, რომლის გათავისუფლებას ადამიანის უფლებათა ევროპული სასამართლო ითხოვს. საქართველოს საელჩომ აზერბაიჯანში თავისი არხებით ინფორმაციის გადამოწმება დაიწყო“, - დაწერა „Взгляд“-მა.

გამოცემის წყაროს განცხადებით, ინფორმაცია ამ ყრილობის შესახებ არის აზერბაიჯანის ერთგვარი მინიშნება ქართული მხარისთვის, რათა თბილისმა არ დაუშვას მისი ჩატარება. წყარომ აღნიშნა, რომ ქართული მხარის პოზიციის გამო, რომელსაც სურს, აზერბაიჯანთან მტკიცე სტრატეგიული ურთიერთობები ჰქონდეს, აზერბაიჯანელი ოპოზიციონერები გასამგზავრებლად სხვა ქვეყნებს ირჩევენ.