პოლიტიკა

რუსულ-ქართული საპარლამენტთაშორისო ჯგუფის მუშაობა „ოთხოზორია-ტატუნაშვილის“ სიის მიღებაზე იქნება დამოკიდებული - ლეონიდ კალაშნიკოვი

რუსულ-ქართული საპარლამენტთაშორისო ჯგუფის მუშაობა იქნება დამოკიდებული საქართველოში „ოთხოზორია-ტატუნაშვილის“ სიის მიღებაზე. ამის შესახებ „რია ნოვოსტის“ დსთ-ის საკითხთა სახელმწიფო დუმის კომიტეტის დეპუტატმა ლეონიდ კალაშნიკოვმა განუცხადა.

მისი თქმით, იგეგმება მესამე შეხვედრა ქართულ დელეგაციასთან.

„ჩვენ მესამე შეხვედრა გვაქვს დაგეგმილი, მაგრამ სიტუაციას ამძიმებს ის, რომ საქართველოში გადაწყვიტეს მიიღონ სანქციების სია. „პატრიოტთა ალიანსის“ დეპუტატები გვთხოვდნენ ხელი შეგვეწყო ქართველებს, აფხაზებსა და ოსებს შორის საფლავების მონახულების პროცედურების გამარტივებისთვის, ახლა კი ამის ნაცვლად სანქციების სიის მიღებას აპირებენ. ვნახოთ, როგორ განვითარდება ეს სიტუაცია, რის მიხედვითაც მივიღებთ გადაწყვეტილებას ვადებისა და დროის საკითხზე“, - განაცხადა კალაშნიკოვმა.

ცნობისთვის, ბოლოს ლეონიდ კალაშნიკოვი „პატრიოტთა ალიანსის“ წევრებს შეხვდა მოსკოვში, 2017 წლის ოქტომბერში.

რაც შეეხება „ოთხოზორია-ტატუნაშვილის“ სიას, რომელიც პარლამენტის მიღებულ რეზოლუციაში შედის, ის საქართველოს მთავრობამ უნდა შეადგინოს. მასში საქართველოს მოქალაქეების წინაშე ჩადენილი დანაშაულისთვის მსჯავრდებული/ბრალდებული პირები იქნებიან შესული.