პოლიტიკა

რუსულ მხარეს შენგენის ზონის მსგავსი მიმოსვლა შევთავაზეთ - ადა მარშანია

,,პატროტთა ალინსის" წევრები ადა მარშანია და ნატო ჩხეიძე რუსეთიდან დაბრუნდნენ.

როგორც ადა მარშანიამ ჟურნალისტებს აეროპორტში განუცხადა, ვიზიტისას რუსულ მხარესთან საუბარის მთავარი თემა ცხინვალსა და სოხუმთან დაკავშირებული საკითხები იყო.

,,შეიქმნება სამუშაო ჯგუფები, რომლებიც იმუშავებენ ალბათ სექტემბრის თვიდან. იცით თქვენ რომ, აგერ უკვე 25 წლის განმავლობაში აფხაზეთიდან და ცხინვალის რეგიონიდან გამოდევნილი ჩვენი მოსახლეობა ვერ შედის იქ და საფლავებზე ვერ გადის.

ჩვენი უმთავრესი მიზანი უნდა იყოს მოსახლეობის რაც შეიძლება მაქსიმალური და თავისუფალი მიმოსვლა ამ ოკუპირებულ ტერიტორიებზე’’, - განაცხადა ადა მარშანიამ.

დეპუტატის ტქმით, მათ რუსულ მხარეს შესთავაზეს საქართველო-ნატო-რუსეთის ფორმატის შექმნა.

,,ნატოს საკითხი და საქართველოს სწრაფვა ნატოსკენ - ამაზეც ვისაუბრეთ ძალიან გულახდილად. მოხდა უპრეცედენტო რამ; ჩვენ შევთავაზეთ რუსულ მხარეს, რომ ამ საკითხებზე სერიოზულად ვიმსჯელოთ და შევქმნათ ფორმატი საქართველო-ნატო, რუსეთი. რუსულმა მხარემ გვიპასუხა, რომ ძალიან საინტერესო იდეაა. ანუ არ იყო უარყოფილი ეს იდეა, რთულად მიღებული და აღქმული. მათ ესმით, რომ ეს საკითხი სერიოზულ გავლენას ახდენს ჩვენს ურთიერთობებზე. ჩვენ მიგვაჩნია, რომ ეს არის სერიოზული შეთავაზება და სერიოზული გარღვევა. მეორე გარღვევა - ჩვენ დავაფიქსირეთ, რომ სამწუხაროდ, პირდაპირი დიალოგი არ მიმდინარეობს აფხაზებთან და ოსებთან და სისტემატურად ვაფიქსირებთ ჩვენს პოზიციას, რომ აფხაზები და ოსები ჩვენი ძმები არიან. ურთულეს მდგომარეობაში ვართ, ძალიან დიდი დრო გავიდა, ამიტომ გასაკვირია, რატომ არ არის აქამდე ჩვენს შორის დამყარებული პირდაპირი დიალოგის ფორმატი. ჩვენ იმედი გამოვთქვით, რომ რუსული მხარე ამ საკითხში დაგვეხმარება და ხელს შეგვიწყობს“, - აღნიშნა ადა მარშანიამ.

მან ასევე აღნიშნა რომ რუსულ მხარეს შენგენის ზონის მსგავსი მიმოსვლა შესთავაზეს, რომელიც ვიზის საჭიროებას აღარ მოითხოვს.

,,ჩვენ შევთავაზეთ შენგენის ზონის ანალოგად, რომ თუ ადამიანი წარმოადგენს ავიაბილეთს და სასტუმროს ჯავშანს, მას ავტომატურად მიეცეს ვიზა რუსეთში’’, - განაცხადა ადა მარშანიამ.

ნინო ექვთიმიშვილი