პოლიტიკა

რუსულ არხს საქართველოს მთავრობა 1 მილიონ 100 ათას დოლარს გადაუხდის რეკლამის გაშვებისთვის

საქართველოს ხელისუფლება ანტიქართული და ანტიდასავლური პროპაგანდით გამორჩეულ რუსულ არხ „Россия 1“-ს 1 მილიონ 100 ათას დოლარს გადაუხდის, რათა ტელევიზიის ეთერში ერთი თვის განმავლობაში იტრიალოს სარეკლამო რგოლმა საქართველოს ზაფხულის ტურისტული სეზონის შესახებ.

ტურიზმის ეროვნული ადმინისტრაციის ხელმძღვანელის, გიორგი ჩოგოვაძის თქმით, არხის შერჩევა საკონკურსო პირობებიდან გამომდინარე მოხდა.

„არჩევა მოხდა ფასიდან და ხარისხიდან გამომდინარე, ამ შემთხვევაში იგულისხმევა სარეკლამო ვიდეორგოლების გაშვების რაოდენობა და ფასი, შესაბამისად, ჩვეულებრივი საკონკურსო პირობებით გაიმარჯვა ამ შემოთავაზებამ“, - უთხრა ჩოგოვაძემ რუსთავი 2-ს.

მისივე თქმით, რეკლამის განთავსების კომპანიებს საშუალება ჰქონდათ, შემოეთავაზებინათ რუსეთის სამი არხიდან საუკეთესო. ამ შემთხვევაში საუკეთესო შემოთავაზება იყო წამოსული „Россия 1“-ისგან, რის გამოც არჩევანი მასზე შეჩერდა.

„Россия 1“-ზე საქართველოს შესახებ სარეკლამო რგოლების განთავსებაზე იზრუნებს ჩეხური კომპანია „ალიანს მედია“, რომელთანაც ტურიზმის ეროვნულმა ადმინისტრაციამ მილიონ 500 ათასი დოლარის ღირებულების ხელშეკრულება რამდენიმე დღის წინ გამარტივებული შესყიდვით გააფორმა.

თბილისის საკრებულოს ფრაქცია „ერთიანი ნაციონალური მოძრაობის“ თავმჯდომარის, ირაკლი ნადირაძის თქმით, საქართველოს მთავრობის მიერ რუსულ არხზე, რომელიც 2008 წლის აგვისტოს ომის დროს დეზინფორმაციას ავრცელებდა, რეკლამის გაშვება დაუშვებელია.

„2008 წელს, როცა გორი იბომბებოდა და კორპუსებს ცეცხლი ეკიდა და ჩვენი მშვიდობიანი მოქალაქეები დახოცილები იყვნენ, აწერდნენ წარწერას ცხინვალს და როგორც რუსეთის ფედერაციის მოქალაქეებზე, როგორც ცხინვალში დაღუპულ მოქალაქეებზე დაბომბილ ცხინვალში, იმ კადრებად ასაღებდნენ. ფაქტობრივად, საქართველოს მთავრობამ ტურიზმის ეროვნული ადმინისტრაციის მეშვეობით რუსეთის პროპაგანდისტულ ტელეარხებს აფინანსებს, იმ არხებს, რომლებიც ყველანაირად, ყოველდღიურად ცდილობენ საქართველოს დაკნინებას“, - თქვა ნადირაძემ.

ვიდეორგოლები საქართველოს შესახებ „Россия 1“-ის ეთერში აპრილის თვიდან უნდა განთავსდეს. რეკლამა არხზე ერთი თვის განმავლობაში იტრიალებს.