პოლიტიკა

„რუსთავი 2“-ის საქმესთან დაკავშირებით სუს-ი მოსამართლეებზე ზეწოლას ახორციელებდა - ნიკა მელია

ნაციონალური მოძრაობის წევრმა ნიკა მელიამ დღეს გამართულ ბრიფინგზე განაცხადა, რომ „რუსთავი 2“-ის საქმესთან დაკავშირებით უზენაესი სასამართლოს ორ მოსამართლეზე, პაატა ქათამაძესა და ბესარიონ ალავიძეზე, სუს-ი ზეწოლას ახორციელებდა.

„გაირკვა, რომ 14 იანვარს უზენაესი სასამართლოს მოსამართლეებმა მიმართეს გენპროკურატურას იმის თაობაზე, რომ სახელმწიფო უსაფრთხოების სამსახური, იგივე სუს-ი,ახდენდა ზეწოლას მოსამართლეებზე კონკრეტულ საქმესთან დაკავშირებით. ეს კონკრეტული საქმე გახლავთ, არც მეტი, არც ნაკლები, „რუსთავი 2“-ის საქმე. შეგახსენებთ, რომ ამ უწყებას ხელმძღვანელობს ბიძინა ივანიშვილის ყოფილი დაცვის უფროსი, ბატონი გომელაური“, - განაცხადა მელიამ.

ბრიფინგზე მელიამ სახელმწიფო უსაფრთხოების სამსახურის უფროსის ვახტანგ გომელაურის გადადგომა მოითხოვა.

„ჩვენ არ ვაპირებთ ამ საქმესთან დაკავშირებით ვიყოთ ჩუმად, ჩვენ ვაპირებთ, ძალიან აქტიურად ვიმოქმედოთ, ვინაიდან ახლა არის სწორედ მოქმედების დრო, და გვაქვს ერთი ძალიან კატეგორიული მოთხოვნა, ბატონი გომელაური, სუს-ის უფროსი უნდა გადადგეს დაკავებული თანამდებობიდან, ვინაიდან უკვე ნათლადაა მოცემული, რომ ბატონი გომელაური არის მხოლოდ ინსტრუმენტი ივანიშვილის მხროდან,“- თქვა მელიამ.

მელიამ მიმართა საქართველოს პრეზიდენტს , რომ მან დააფიქსიროს თავისი აზრი მოსამართლეთა საქმესთან დაკავშირებით.

„ჩვენ ასევე მივმართავთ პრეზიდენტს, რომ მისი კონსტიტუციური ვალდებულებების ფარგლებში, აუცილებლად დაიცვას მიუკერძოებელი მოსამართლეების უფლებები,“- განაცხადა „ნაციონალური მოძრაობის“ წევრმა.

მელიამ მონაწილეობისკენ მოუწოდა, აგრეთვე, პოლიტიკურ გაერთიანებებსა და მესამე სექტორის წარმომადგენლებს.

ანა მებურიშვილი