პოლიტიკა

რუსი დიპლომატის გაძევებაზე ხელისუფლება და უმრავლესობა ერთ პოზიციაზეა - გია ვოლსკი

საპარლამენტო უმრავლესობის წევრი, გია ვოლსკი გამოეხმაურა საქართველოდან რუსი დიპლომატის გაძევების საკითხს.

პირველი არხის გადაცემის „აქტუალური თემა მაკა ცინცაძესთან ერთად“ წამყვანის, მაკა ცინცაძის შეკითხვაზე, არის თუ არა უმრავლესობაში ერთსულოვანი პოზიცია აღნიშნულ გადაწყვეტილებაზე, დეპუტატმა დადებითად უპასუხა.

„ვითარება დღემდე ისე მოვიტანეთ, რომ სტაბილურობა და განვითარება უზრუნველყოფილი იყო. იმაზე, რაც კეთდება, პასუხისმგებლობას ხელისუფლება იღებს და მისი მხარდამჭერი უმრავლესობის გუნდი რასაკვირველია, იგივე პოზიციაზეა“,- განაცხადა დეპუტატმა გადაცემაში.

მისი განმარტებით, რუსი დეპუტატის გაძევება არის დემარში, რომელიც ეხმაურება მსოფლიოში მიმდინარე ამბებს.

„ეს არის რეალური მდგომარეობა, როდესაც დემარში აუცილებელია, არა მხოლოდ იქიდან გამომდინარე, რომ ბრიტანეთმა იგივე გააკეთა, არამედ იმიტომაც, რომ საქართველო–რუსეთის ურთიერთობა, კონფლიქტი და დაძაბულობა მსოფლიოში მიმდინარე ძალიან მძიმე პროცესების სეგმენტია“,- თქვა ვოლსკიმ.

რაც შეეხება ირმა ინაშვილის განცხადებას, რომ საქართველოდან რუსი დიპლომატის გაძევებით ფაქტობრივად, წინა საომარ ვითარებაში ვართ და რა საპასუხო პოლიტიკურ გადაწყვეტილებას ელოდება ქართული მხარე ოფიციალური მოსკოვისგან, ვოლსკიმ აღნიშნა, რომ უჭირს თქმა, რომ „პატრიოტთა ალიანსის“ ლიდერი არაგულწრფელი იყო. თუმცა იქვე დაამატა, რომ მაშინ, როდესაც საქართველო-რუსეთის დიპლომატიური ურთიერთობა მსოფლიოში ყველაზე დაბალ ნიშნულზეა, გულუბრყვილობაა განცხადება, თითქოს, დიპლომატიური მისიიდან ერთი ადამიანის გაძევება რუსეთის საქართველოში შემოჭრის მიზეზი შეიძლება გახდეს.

დეპუტატმა გაამახვილა ყურადღება, რომ მეორე ოპოზიციური ფრთა რუსეთის მიმართ უფრო რადიკალური ზომების გატარების მომხრეა.

„ეს ერთი მხარეა და მეორე მხარე, იგივე „ნაციონალური მოძრაობა“ და ახალი ნაციონალური მოძრაობა ამტკიცებს, რომ რადიკალური უნდა ვიყოთ და ყველანაირი მოლაპარაკების ფორმატი უნდა მოვსპოთ, რაც არათუ წინდაუხედავი, არამედ ისეთი განცხადებაა, რომელიც მხოლოდ საკუთარი პოლიტიკური პარტიის რაღაც გარკვეულ ნიშაში მოქცევას ემსახურება“, – განაცხადა ვოლსკიმ.

მისი თქმით, ყველა განცხადება და მოქმედება, რასაც საქართველოს ხელისუფლება მიმართავს, მთავარ მიზანზე, სტაბილურობისა და განვითარების ტემპის შენარჩუნებაზეა გათვლილი.

„ჩვენი ოპონენტები გვიბიძგებენ, იქნებ, კათოლიკობაში რომის პაპს გადავაჭარბოთ; იქნებ, რუსეთთან უფრო მეტ კონფლიქტში შევიდეთ და ამ ქვეყანას დამატებითი მიზეზი მივცეთ, რათა ის ძალიან მყიფე კავშირებიც გავწყვიტოთ, რომლებიც ჟენევაში, ან აბაშიძე–კარასინის მოლაპარაკების ფორმატში გაგვაჩნია“, – განაცხადა დეპუტატმა.

გუშინ საქართველოს საგარეო საქმეთა სამინისტრომ განაცხადა, რომ საქართველოში შვეიცარიის კონფედერაციის საელჩოს რუსეთის ინტერესების სექციის თანამშრომელს მიუღებელ პიროვნებად აცხადებს და მოითხოვს მის მიერ საქართველოს დატოვებას 7 დღის ვადაში.