პოლიტიკა

რუსი დეპუტატები თბილისს ეწვევიან

რუსეთის ფედერაციის სახელმწიფო სათათბიროს დელეგაცია ქართველ კოლეგებთან მოსალაპარაკებლად თბილისში ჩამოვა.

როგორც რუსული გამოცემა ,,იზვესტია’’ წერს, ვიზიტის ინიციატორი ქართველი დეპუტატები არიან. საპარლამენტო დიპლომატია კი, გაზეთის ცნობით, უნდა დაეხმაროს რუსეთსა და საქართველოს დიპლომატიური ურთიერთობების დალაგებაში.

რუსეთის სახელმწიფო დუმის დსთ-ს ქვეყნების კომიტეტის თავმჯდომარის ლეონიდ კალაშნიკოვის განცხადებით, თბილისში რუსი კოლეგები მიიწვიეს ქართველმა დეპუტატებმა ,,პატრიოტთა ალიანსიდან.’’

,,ჩვენ აუცილებლად გავემგზავრებით თბილისში. რუსი პარლამენტარები როგორც მინიმუმ 10 წელი არ ყოფილან საქართველოში. ასეთი კონტაქტები აუცილებელია საკითხების ფართო სპექტრის გადასაწყვეტად. შეხვედრებზე განხილული იქნება დიპლომატიური ურთიერთობები, ეკონომიკა, შევეცდებით გადავწყვიტოთ ვიზებთან დაკავშირებული საკითხებიც. კარგია, რომ ეს ინიციატივა ორმხრივია’’, - განაცხადა დეპუტატმა.

მისივე თქმით, ორივე მხარე ორიენტირებულია შედეგზე და ცდილობს შეძლებისდაგვარად საკუთარი წვლილი შეიტანოს მოსკოვისა და თბილისის კონტაქტების უფრო სერიოზულ დონეზე აყვანაში.

,,საპარლამენტო დიპლომატიამ ხელი უნდა შეუწყოს ჩვენს ურთიერთობებში არსებული სერიოზული საკითხების გადაწყვეტას’’, - აღნიშნა კალაშნიკოვმა ,,იზვესტიასთან’’ საუბარში.

შეგახსენებთ, რომ „პატრიოტთა ალიანსის“ წევრები მოსკოვში დუმის დეპუტატებს 11 ივლისს შეხვდნენ.

ნინო ექვთიმიშვილი