პოლიტიკა

რუსეთთან დიპლომატიური ურთიერთობის აღდგენის საკითხი, შესაძლოა, დღის წესრიგში დადგეს - ზურაბ აბაშიძე

საქართველოს პრემიერ–მინისტრის სპეციალური წარმომადგენელის რუსეთთან ურთიერთობების საკითხებში ზურაბ აბაშიძის განცხადებით, გარკვეული პირობების შექმნის შემთხვევაში, რუსეთთან დიპლომატიური ურთიერთობის აღდგენის საკითხი, შესაძლოა, დღის წესრიგში დადგეს.

ამის შესახებ აბაშიძემ Известия-თან საუბარში განაცხადა.

გამოცემამ, თებერვალში დაგეგმილ აბაშიძე-კარასინის მორიგ შეხვედრას სტატია მიუძღვნა, სადაც მიმოხილულია საქართველოსთვის უვიზო რეჟიმის დაწესების საკითხიც.

სავიზო რეჟიმის თემის კომენტირებისას აბაშიძემ გამოცემას განუცხადა, რომ სავიზო რეჟიმის გაუქმება „სწორი მიმართულებით გადადგმული ნაბიჯი“ იქნება და ხაზი გაუსვა, რომ საკითხის მოგვარება რუსეთის პრეროგატივაა.

„სავიზო რეჟიმის სამომავლო პერსპექტივა რუსეთმა უნდა განსაზღვროს, ეს მისი პრეროგატივაა, ჩვენ ვერანაირ გადაწყვეტილებს მას ვერ მოვახვევთ. რაც შეეხება ქართულ მხარეს, ჩვენ ჯერ კიდევ 2011 წლიდან გავაუქმეთ სავიზო მოთხოვნა რუსეთის მოქალაქეების მიმართ და მათ საქართველოს ტერიტორიაზე ყოფნა ერთი წლის განმავლობაში შეუძლიათ. ასეთი კომფორტული სავიზო რეჟიმი მრავალი ქვეყნის მოქალაქეებისთვის არის შემოღებული და ამან პოზიტიური შედეგი მოიტანა: გასულ წელს საქართელოს ტურისტების რეკორდული მაჩვენებელი ეწვია, მათგან დაახლოებით 1 მილიონი რუსეთიდან“,-განაცხადა ზურაბ აბაშიძემ.

ამასთან, იზვესტია აღნიშნავს, რომ ზურაბ აბაშიძემ განაცხადა, რომ სავიზო რეჟიმის საკითხი და რუსეთთან დიპლომატიური ურთიერთობის აღდგენა ერთმანეთთან მიბმული არ იქნება.

თუმცა, აბაშიძის თქმით, გარკვეული პირობების შექმნის შემთხვევაში, დიპლომატიური ურთიერთობების აღდგენის საკითხი, დღის წესრიგში, შესაძლოა დადგეს.

პრაღის მორიგ შეხვედრაზე საუბარისას კი, აბაშიძემ განაცხადა, რომ ამ ფორმატში ტრადიციულად სავაჭრო-ეკონომიკურ კავშირებს, სატრანსპორტო კომუნიკაციებსა და „გარკვეულ ჰუმანიტარულ პრობლემებს“ განიხილავენ.

მისივე თქმით, თბილისი მზად არის გააგრძელოს პრაქტიკულ საკითხებზე დიალოგი პრაღასა და ჟენევის საერთაშორისო დისკუსიებში.

აბაშიძის თქმით, „ქართულ მხარეს ამისთვის მზაობა და პოლიტიკური ნება გააჩნია“.

მონიკა დავლიანიძე