პოლიტიკა

რუსეთში ჩემი მომავალი ვიზიტები შეიძლება იყოს დაკავშირებული ჩემს საპრეზიდენტო გეგმებთან - ნინო ბურჯანაძე

„დემოკრატიული მოძრაობის“ ლიდერმა, ნინო ბურჯანაძემ არ გამორიცხა, რომ მისი მომდევნო ვიზიტები მოსკოვში დაკავშირებული იყოს მის საპრეზიდენტო ამბიციებთან. ამის შესახებ მან გადაცემა „360 გრადუსში“ განაცხადა.

„მე არ გამოვრიცხავ, რომ მომავალში ჩემი ვიზიტები დაუკავშირდეს ჩემს საპრეზიდენტო გეგმებს, მაგრამ ეს ვიზიტი ამჯერად ამასთან დაკავშირებული ნამდვილად არ იყო მარტივი მიზეზის გამო - ჟურნალისტები, რომლებსაც ეს გადაცემა მიჰყავდათ, თვეების განმავლობაში მთხოვდნენ, რომ ჩავსულიყავი. უბრალოდ იყო გარკვეული პრობლემები, ხან რა გამოჩნდა, ხან - რა, შემდეგ იყო არჩევნები და მე ეს ფიზიკურად ვერ მოვახერხე, ბოლოს უარის თქმა ძალიან მომერიდა. ამჯერად ეს დაკავშირებული იყო მხოლოდ ამ გადაცემასთან, თუმცა უახლოეს ხანებში მე კიდევ მომიწევს მოსკოვში წასვლა, ასევე მნიშვნელოვან და საინტერესო გადაცემაში მონაწილოების მისაღებად“, - თქვა ბურჯანაძემ.

ბურჯანაძის თქმით, მისი პრეზიდენტობის შემთხვევაში ის საქართველოს ინტერესებისთვის მეზობლის ნებისმიერ შეცდომას გამოიყენებს.

„პოლიტიკა არაა კეთილშობილ ქალიშვილთა ინსტიტუტი“, -აღნიშნა პოლიტიკოსმა.

შეგახსენებთ, ნინო ბურჯანაძე მოსკოვში იმყოფებოდა, სადაც რამდენიმე რუსულ ტოქშოუში მიიღო მონაწილეობა.

ანა მებურიშვილი