სამართალი

რუსეთის მოქალაქის ძარცვის საქმის ბრალდებულებს პატიმრობა შეეფარდათ

თბილისში, ალექსიძის ქუჩაზე, რუსეთის მოქალაქის ძარცვის ფაქტზე ბრალდებულ სამ პირს, საქალაქო სასამართლომ პატიმრობა შეუფარდა.

მათ ბრალად ედებათ ძარცვა, ე. ი. სხვისი მოძრავი ნივთის აშკარა დაუფლება მართლსაწინააღმდეგო მისაკუთრების მიზნით, ჩადენილი წინასწარი შეთანხმებით, ჯგუფის მიერ, ძალადობით, რომელიც საშიში არ არის სიცოცხლისათვის.

7 სექტემბერს, თბილისში, ალექსიძის ქუჩაზე, რუსეთის მოქალაქეს თავსდაესხნენ..

რუსეთის მოქალაქემ სხეულზე სხვადასხვა ადგილას მიიღო ფიზიკური დაზიანებები.

ბრალდებულებმა რუსეთის მოქალაქეს ზურგჩანთა წაართვეს, რომელშიც განთავსებული იყო მობილური ტელეფონი და ფულადი თანხა - 13 ათასი აშშ დოლარი (32 240 ექვივალენტი ლარში) ოდენობით.

„ღია სასამართლო სხდომაზე შუამდგომლობის განხილვისას სასამართლომ მიიჩნია, რომ ბრალდებულის მიმართ ნაკლებად მკაცრი აღკვეთის ღონისძიება ვერ იქნება შემაკავებელი, პროპორციული ზომა აღკვეთის ღონისძიების მიზნების მისაღწევად. განსაკუთრებით მძიმე კატეგორიის დანაშაულის დამტკიცების შემთხვევაში, ბრალდებულებს 7-დან 11 წლამდე თავისუფლების აღკვეთა ემუქრებათ. დასაბუთებული ვარაუდის სტანდარტით, სასამართლოს განჩინების თანახმად, არსებობს ბრალდებულების მხრიდან მიმალვის, ახალი დანაშაულის ჩადენის, დანაშაულებრივი საქმიანობის გაგრძელებისა და გამოძიებისათვის ხელის შეშლის საფრთხეები.

საქმეზე წინასასამართლო სხდომა 2017 წლის 2 ნოემბერს, 11:00 საათზე გაიმართება“,-ნათქვამია თბილისის საქალაქო სასამართლოს პრესსამსახურის მიერ გავრცელებულ განცხადებაში.

მონიკა დავლიანიძე