პოლიტიკა

რუსეთის მიერ საქართველოს ოკუპაცია და საქართველოს რეგიონების დამოუკიდებელ ქვეყნებად გამოცხადება ისტორიული ანომალია და უსამართლობაა - საქართველოს პრეზიდენტი

გიორგი მარგველაშვილი 15-16 მარტს ამერიკის შეერთებულ შტატებში იმყოფებოდა. ვიზიტის მთავარი ამოცანა საქართველოს უსაფრთხოების მიმართ აშშ-ის ხელისუფლების წარმომადგენლების მხარდაჭერის გამყარება, ინტენსიური დიალოგის გაძლიერება და საქართველოს მხარდამჭერთა კონსოლიდაცია იყო.

საქართველოს პრეზიდენტი ვაშინგტონში,კონგრესში გამართულ კონფერენციაზე, რომელიც “აშშ-საქართველოს პარტნიორობის” საკითხებს მიეძღვნა, საქართველოს მხარდამჭერი აქტის მიღების ინიციატივით გამოვიდა,

„სასიხარულოა, რომ საქართველო აღიქმება, როგორც ამერიკის შეერთებული შტატების განსაკუთრებული პარტნიორი და მოკავშირე ქვეყანა რეგიონში, ამ განსაკუთრებულ პარტნიორობას კი განსაკუთრებული დაფასება სჭირდება. სწორედ ამიტომ საქართველოს მხარდამჭერი აქტი მომდევნო ლოგიკური ნაბიჯი იქნებოდა ამ განსაკუთრებული ურთიერთობების მხარდაჭერისა და განმტკიცებისათვის”, - განაცხადა პრეზიდენტმა.

ვიზიტის ფარგლებში, გიორგი მარგველაშვილ აშშ-ის კონგრესის სპიკერ პოლ რაიანს, აშშ-ის კონგრესის უმრავლესობის ლიდერს, კონგრესმენ კევინ მაკკარტისა და კონგრესმენ ტედ პოს შეხვდა და რუსეთის მიერ საქართველოს ოკუპაციასა და ბოლო დროს კონფლიქტის რეგიონში წარმოქმნილ პრობლემებზე, კერძოდ, არჩილ ტატუნაშვილის საკითხებზე ესაუბრა.

„რუსეთის მიერ საქართველოს ოკუპაცია და საქართველოს რეგიონების დამოუკიდებელ ქვეყნებად გამოცხადება ისტორიული ანომალია და უსამართლობაა. საქართველო დაისაჯა გადაწყვეტილებისათვის, გამხდარიყო დამოუკიდებელი”, – აღნიშნა პრეზიდენტმა საუბრისას.

კონგრესმენებმა გიორგი მარგველაშვილთან საქართველოს ნატო-ში ინტეგრაციის პროცესი განიხილეს და ნატო-ს მომავალი სამიტის შესახებ ისაუბრეს. მათ კიდევ ერთხელ აღნიშნეს საქართველოს დემოკრატიული რეფორმებისა და ქვეყნებს შორის ორმხრივი ურთიერთობების განვითარების მნიშვნელობა.

ცირა გურგენიძე