პოლიტიკა

რუს და ქართველ ხალხებს აქვთ ურთიერთობის ნორმალიზებისა და აღდგენის მოთხოვნა - კონსტანტინ კოსაჩოვი

რუს და ქართველ ხალხებს აქვთ ურთიერთობის ნორმალიზებისა და აღდგენის მოთხოვნა , - განაცხადა რუსეთის ფედერაციული საბჭოს საერთაშორისო კომიტეტის ხემძღვანელმა კონსტანტინ კოსაჩოვმა გუშინ საქართველოს პარლამენტის ფრაქცია ,,საქართველოს პატრიოტების“ წევრებთან შეხვედრის შემდეგ.

,,ბოლო დროს საპარლამენტო ხაზით კონტაქტები გაყინული აღმოჩნდა. დარწმუნებული ვარ, რომ ეს არის შეცდომა, რომელიც უნდა გამოსწორდეს“, - განაცხადა კოსაჩოვმა.

მისივე თქმით, დარწმუნებულია, რომ ,,ჩვენი ერები მზად არიან ურთიერთობის აღდგენისთვის.“

როგორც კოსაჩოვმა აღნიშნა, ასეთ სიტუაციებში საპარლამენტო დიპლომატია მზადაა, გამონახოს ახალი შესაძლებლობები ურთიერთობების აღსადგენად.

,,საზოგადოებრივი მოთხოვნა ორ ქვეყანას შორის ურთიერთობების ნორმალიზებაზე არსებობს. ჩვენ როგორც პარლამენტარებმა ორიენტირება უნდა მოვახდინოთ არა პოლიტიკურ კონიუნქტურაზე, არამედ ხალხის მოთხოვნებზე“, - თქვა რუსეთის ფედერაციული საბჭოს კომიტეტის ხელმძღვანელმა.

როგორც ,,რია ნოვოსტი“ წერს, კოსაჩოვნა აქვე ,,სიამოვნებით აღნიშნა, რომ ორ ქვეყანას სავაჭრო-ეკონომიკური ურთიერთობები ერთ ადგილზე არ არის გაჩერებული.“

რუსულ სააგენტოს ,,პატრიოტთა ალიანსის“ საპარლამენტო დელეგაციის ხელმძღვანელის გიორგი ლომიას კომენტარიც მოყავს.

ლომიას განცხადებით, ორ ქვეყანას შორის ურთიერთობა ჩიხში მიხეილ სააკაშვილის პრეზიდენტობის დროს შევიდა.

,,სამწუხაროდ, ჩვენი პარტია ერთადერთია პარლამენტში, ვისაც ესმის, რომ რუსეთთან, აფხაზეთთან დიალოგის გარეშე ამ ჩიხიდან გამოსვლა შეუძლებელია“, - აღნიშნა ლომიამ.

,,რია ნოვისტის“ ინფორმაციით, შეხვედრის დროს ქართველმა დეპუტატებმა წუხილი გამოთქვეს იმასთან დაკავშირებით, რომ საქართველოს მოსახლეობას არ აქვს საშუალება მოინახულოს ახლობლების საფლავები ცხინვალის რაიონში.

ნინო ექვთიმიშვილი