პოლიტიკა

რთულია არ აღფრთოვანდე იმ პროგრესით, რომელსაც საქართველომ მიაღწია ამდენი წინააღმდეგობის გათვალისწინებით - აშშ-ის თავდაცვის მდივნის თანაშემწე

აშშ-ის თავდაცვის დეპარტამენტის განცხადებით, საქართველო აშშ-სთვის უაღრესად მნიშვნელოვანი სტრატეგიული პარტნიორია. გავრცელებულ პრესრელიზში აშშ-ის თავდაცვის უწყებაში აღნიშნეს, რომ საქართველო აშშ-სთან საერთო ღირებულებებსა და ინტერესებს იზიარებს.

პრესრელიზში ასევე მოყვანილია ვაშინგტონში აშშ-საქართველოს სტრატეგიული პარტნიორობის კონფერენციაზე, აშშ-ის თავდაცვის მდივნის თანაშემწე რობერტ კარემის მიერ სიტყვით გამოსვლისას გაკეთებული განცხადებები.

რობერტ კარემის თქმით, საქართველოსა და აშშ-ის ქარტიაში გაწერილი პრინციპები: კანონის უზენაესობა, ტერიტორიული მთლიანობა და სუვერენიტეტი დღეს საფრთხის ქვეშაა და ამის მიზეზი რუსეთის მოქმედებებია, რომელიც საერთაშორისო წესრიგს ძირს უთხრის.

„საერთაშორისო წესრიგმა მოიტანა მშვიდობა და კეთილდღეობა. ამ წესრიგის დაცვის გარეშე მშვიდობა და კეთილდღეობა ვერ შენარჩუნდება. ძალიან მნიშვნელოვანია, რომ აშშ-ს ჰყავდეს პარტნიორი საქართველო, რომელიც მზადაა საერთო უსაფრთხოებაში წვლილი შეიტანოს“, – განაცხადა კარემმა.

კარემმა აღნიშნა აშშ-ის ძალისხმევა, მხარი დაუჭიროს საქართველოს. მან ყურადღება გაამახვილა თავდაცვის პროგრამაზე, რომელიც საქართველოს შეიარაღებული ძალების საბრძოლო მზადყოფნას შეუწყობს ხელს და ინსტიტუციონალურ შესაძლებლობებს გაზრდის.

კარემმა ხაზი გაუსვა, რომ საქართველომ პროგრესს იმ პირობებშიც მიაღწია, როცა მისი ტერიტორიების 20% ოკუპირებულია რუსეთის მიერ.

„რთულია არ აღფრთოვანდე იმ პროგრესით, რომელსაც საქართველომ მიაღწია, ამდენი წინააღმდეგობის გათვალისწინებით. საქართველოს მზადყოფნა, დაიცვას საკუთარი ხალხი, ღირებულებები და ევროატლანტიკური ინტეგრაციის კურსი, ნამდვილად შთამბეჭდავია“, – განაცხადა აშშ-ის თავდაცვის მდივნის თანაშემწემ.

კარემმა აღნიშნა საქართველოს მიერ გლობალურ უსაფრთხოებაში შეტანილ წვლილს. მან პატივი მიაგო იმ ქართველი ჯარისკაცების ხსოვნას, ვინც ავღანეთსა და ერაყში დაიღუპა.

„საქართველო თავდაცვის სფეროს მოდერნიზაციითა და გატარებული რეფორმებით სხვა ქვეყნებისთვის სამაგალითოა“, – განაცხადა აშშ-ის თავდაცვის მდივნის თანაშემწემ.