პოლიტიკა

როცა მე ამის თქმას გადავწყვეტ, მაშინ გეტყვით - სალომე ზურაბიშვილი საპრეზიდენტო არჩევნებზე

დამოუკიდებელ დეპუტატ სალომე ზურაბიშვილს არ დაუკონკრეტებია, მიიღებს თუ არა მონაწილეობას საპრეზიდენტო არჩევნებში.

„როცა მოვიფიქრებ, გეტყვით, მოთმინება ძალიან კარგი და მაგარი რამეა. არაფერს არ გეტყვით. როცა მე ამის თქმას გადავწყვეტ, მაშინ გეტყვით“, – უთხრა ზურაბიშვილმა ჟურნალისტებს.

მმართველი პარტიის თავმჯდომარემ ბიძინა ივანიშვილმა პირველ არხთან ინტერვიუში განაცხადა, რომ უმჯობესია, „ქართულმა ოცნებამ“ საპრეზიდენტო არჩევნებზე დამოუკიდებელ კანდიდატს დაუჭიროს მხარი ან ოპოზიციამ გაინაწილოს ეს ინსტიტუტი.

„ბევრი ღირსეული კანდიდატი გვყავს, ვინც მართლაც შეძლებს პირველსავე ტურში გამარჯვებას. გულწრფელად გეტყვით, ჩემი პოზიციაა და „ქართული ოცნების“ წევრებსაც ამ პოზიციიდან ველაპარაკები, რომ გუნდიდან არ დავასახელოთ კანდიდატი, ელემენტარული მიზეზის გამო, ქვეყნის სწრაფი, დემოკრატიული განვითარებისთვის უფრო კარგი იქნება, რომ ჩვენ ღირსეულ დამოუკიდებელ კანდიდატს დავუჭიროთ მხარი, თუ არ იქნება, არც არავის არ დავუჭიროთ და ოპოზიციამ გაინაწილოს ეს ინსტიტუტი“, – განაცხადა ივანიშვილმა.