პოლიტიკა

რომელიმე სპორტის წარმომადგენელი უნდა ყოფილიყავი, რომ პირველკლასელის ჩანთის ტარება შეგძლებოდა - მიხეილ ბატიაშვილი

განათლების, კულტურის და სპორტის მინისტრობის კანდიდატის, მიხეილ ბატიაშვილის განცხადებით, სასკოლო სახელმძღვანელოების საკითხზე მუშაობა გრძელდება. კერძოდ, მან გამოჰყო სასკოლო სახელმძღვანელოების სიმძიმის საკითხი და აღნიშნა, რომ ამაზე გარკვეული პრობლემები გადაწყვეტილია.

გარდა ამისა, ბატიაშვილმა ხაზი გაუსვა თანამედროვე მსოფლიო სახელმძღვანელოების ხელმისაწვდომობის საკითხს ქართულ სკოლებში.

„მოხდა განახლება სასწავლო გეგმების და ახალი სახელმძღვანელოები შევა სექტემბრიდან სკოლებში. ვიცი, რომ პედაგოგების გადამზადება მიმდინარეობს ახალი სასწავლო გეგმების მიხედვით. ვიცი, რომ სახელმძღვანელოების წონის პრობლემა იყო - რომელიმე სპორტის წარმომადგენელი უნდა ყოფილიყავი, რომ პირველკლასელის ჩანთის ტარება შეგძლებოდა. როგორც ვიცი, ამ კუთხით გარკვეული პრობლემები გადაწყვეტილია, თუმცა ამას განვითარება სჭირდება. სკოლების სახელმძღვანელოების მიმართულებით მუშაობა გაგრძელდება. ვფიქრობთ, რომ ხელმისაწვდომი უნდა გახდეს როგორც ქართველი ავტორების ნამუშევრები, ასევე ძალიან აქტიურად უნდა ვიმუშაოთ, რომ მსოფლიოში არსებული სახელმძღვანელოები ხელმისაწვდომი იყოს ყველა ბავშვისთვის. ანუ ყველაზე თანამედროვე გამოცემები, რომელიც არის ევროპისა და ამერიკის განვითარებული ქვეყნების სკოლებში, რატომ არ უნდა იყოს ხელმისაწვდომი? ჩვენ ამაზე ვიმუშავებთ. ვფიქრობთ, ამ მიმართულებით გავაგრძელებთ მუშაობას, თუ როგორ შეიძლება გავამდიდროთ სახელმძღვანელოების ნაწილი“, - განაცხადა ბატიაშვილმა საპარლამენტთო კომიტეტთა გაერთიანებულ სხდომაზე.