პოლიტიკა

რომან გოცირიძემ კახა კალაძისა და „გაზპრომის“ მიერ დადებულ ხელშეკრულებაზე გამოძიების დაწყება მოითხოვა

„ერთიანი ნაციონალური მოძრაობის“ ერთ-ერთმა ლიდერმა, რომან გოცირიძემ მოითხოვა პარლამენტის საგამოძიებო კომისიის შექმნა, რომელიც გამოიძიებს კახა კალაძისა და რუსული „გაზპრომის“ მიერ დადებულ ხელშეკრულებას.

გოცირიძემ აღნიშნა, რომ გუშინდელ საპარლამენტო სხდომაზე ამ საკითხის ნდობის ჯგუფისთვის გადაცემას განიხილავდნენ, თუმცა ენმ-ის ლიდერის განმარტებით, ნდობის ჯგუფი ამ დრომდე არ შექმნილა. გოცირიძის თქმით, ნდობის ჯგუფს მსგავსი კომერციული საქმეები არ ეხება, რადგან ის ორიენტირებულია თავდაცვის საკითხებზე.

,,გუშინ უმრავლესობამ პარლამენტში გააკეთა განცხადება, თითქოსდა კალაძე მზად იყო, ნდობის ჯგუფში მოსულიყო და იქ მოეთხრო ,,გაზპრომთან“ გაფორმებული შავ-ბნელი ხელშეკრულების შესახებ. მინდა აღვნიშნო, რომ პარლამენტში ნდობის ჯგუფი არ არსებობს. ის არ შექმნილა. პარლამენტს ნდობის ჯგუფი არ დაუმტკიცებია იმის გამო, რომ ჩვენი კანდიდატურა, სალომე სამადაშვილი ფაქტობრივად იქნა დაბლოკილი და ვერ მოაბეს თავი ნდობის ჯგუფის შექმნას. ნდობის ჯგუფი იხილავს თავდაცვის საკითხებს და მისი უფლებამოსილება არაა, განიხილოს კომერციული კონტრაქტის საკითხები. ეს არის აბსოლიტურად სხვა ფორმატში განსახილველი.

სწორედ ამიტომ მოვითხოვდით ჩვენ პარლამენტში საგამოძიებო კომისისი შექმნას, ვინადიან გვგონია, რომ დაშვებული იქნა სერიოზული შეცდომა. ,,გაზპრომთან“ გაფორმდა ხელშეკრულება, რომელიც ვნებს ქვეყნის ეკონომიკურ, პოლიტიკურ და ფინანსურ ინტერესებს. ამავე დროს აქ ჩანს კერძო ინტერესები, ამიტომ ჩვენ ვითხოვთ გამოძიებას, რათა დადასტურდეს, არის თუ არა ხელისუფლებაში მყოფი ჯგუფების პირადი ინტერესები ,,გაზპრომთან“ დადებულ ამ ანტისახელმწიფოებრივ ხელშეკრულებაში“, -განაცხადა გოცირიძემ.

ანა მებურიშვილი