სამართალი

რომ არა შს მინისტრის ბრძანება, ბექა ხახუბია ცოცხალი იქნებოდა - ზვიად კუპრავა

დღეს გორის რაიონულ სასამართლოში გორის გვირაბთან ავტოსაგზაო შემთხვევის დროს დაღუპული ბექა ხახუბიას საქმეს განიხილავენ.

არასამთავრობო ორგანიზაცია „სამართალდამცველთა რეფორმირების ცენტრის“ ხელმძღვანელმა ზვიად კუპრავამ მომხდარზე პასუხისმგებლობა შინაგან საქმეთა მინისტრ გიორგი მღებრიშვილს დააკისრა.

მისი ინფორმაციით, ავტოსაგზაო შემთხვევამდე ხახუბია დაკავებული იყო, თუმცა მინისტრის ბრძანების საფუძველზე გაუშვეს.

„რომ არა მინისტრის უკანონო ბრძანება და უკანონოდ რომ არ გათავისუფლებულიყო ბექა ხახუბია დაკავებიდან, დღეს ბექა ხახუბია იქნებოდა ცოცხალი, ვინაიდან, ის იმ ღამეს გაატარებდა წინასწარი დაკავების იზოლატორში და მეორე დღეს სასმართლოზე ის ან ჯარიმით, ან სიტყვიერი გაფრთიხლებით გამოვიდოდა სასამართლოდან, დღეს ბექა ხახუბია გააგრძელებდა ცხოვრებას, ის იქნებოდა ცოცხალი, მაგრამ ის შეეწირა მინისტრის უკანონო ბრძანებას“,- განაცხადა კუპრავამ.

21 წლის ბექა ხახუბია ავარიას 16 მაისს ემსხვერპლა.

გავრცელებული ვერსიით, პოლიცია მის შეჩერებას ცდილობდა, რის გამოც გზის გადაკვეთისთვის სატვირთო ტრაილერი გამოიყენეს, რომელსაც შემდგომ ახალგაზრდა მამაკაცი შეეჯახა.

დაღუპული ფოთის მაჟორიტარი დეპუტატის, ირაკლი ხახუბიას შვილი იყო.