პოლიტიკა

როგორც პირველი ტურის წინ, მე ვფიქრობ ამ დღეებშიც ძალიან შესამჩნევია ოპონენტების მხრიდან ერთმანეთის მიმართ აგრესია - სახალხო დამცველი

სახალხო დამცველის, ნინო ლომჯარიას განცხადებით, პირველი ტურის მსგავსად, მეორე ტურის წინაც შესამჩნევია ოპონენტების მიხრიდან ურთიერთაგრესია.

მისივე თქმით, მნიშვნელოვანია ახალქალაქის ინციდენტის დროული გამოძიება და შესაბამისი პირების დასჯა.

„ზოგადად, როგორც პირველი ტურის წინ, მე ვფიქრობ ამ დღეებშიც ძალიან შესამჩნევია ოპონენტების მხრიდან ერთმანეთის მიმართ აგრესია. ვგულისხმობ ვერბალურად გამოხატულ აგრესიას, სოციალურ ქსელებში გამოხატულ აგრესიას, სიძულვილის ენას, დეზინფორმაციის გავრცელებას. თვალს ვადევნებდით ასევე სამოქალაქო სექტორზე თავდასხმას, როგორც ხელისუფლების წარმომადგენლების მხრიდან, ასევე, ორგანიზებულად სოციალურ ქსელებში. რა თქმა უნდა, ახალქალაქის ინციდენტი ძალიან სერიოზული შემთხვევაა, რადგან პირდაპირ ჩანს, რომ აქ არსებობდა პოლიტიკური მოტივი და სწორედ პოლიტიკური დაპირისპირების ნიადაგზე მოხდა ფიზიკური დაპირისპირება. ჩვენ ვფიქრობთ, რომ ამ ფაქტს ჰყავდა არაერთი თვითმხილველი, ვინაიდან, ჩვენ გვაქვს ოფისი და ჩვენი წარმომადგენლები ძალიან დროულად მივიდნენ ადგილზე. მე იმედი მაქვს, რომ პოლიცია დროულად მოახდენს ამ ადამიანების იდენტიფიცირებას. დარწმუნებული ვარ, მოიძებნებიან თვითმხილველებიც და აღნიშნული საქმის გამოძიება მოხდება დროულად, სწრაფად და სწორი კვალიფიკაციით და პირების პასუხისგებაში მიცემა", - განაცხადა ლომჯარიამ.