პოლიტიკა

როგორც გ.ჯ. ამბობს, დავით სარალიძემ შეაგინა და მოჰყვა სიგარეტის სროლა, შემდეგ მოხდა შეხლა-შემოხლა - ზვიად ფხაკაძე

ხორავას ქუჩაზე მოზარდების მკვლელობის საქმის პროკურორის, ზვიად ფხაკაძის განცხადებით, ბრალდების მხარის ინფორმაციით, მხარეები ხორავას ქუჩაზე შესარიგებლად წავიდნენ, თუმცა მოლაპარაკებების პროცესში დავით სარალიძესა და გ.ჯ.-ს შორის სიტუაცია დაიძაბა.

„როგორც გ.ჯ. ამბობს, დავით სარალიძემ შეაგინა და მოჰყვა სიგარეტის სროლა... შემდეგ მოხდა შეხლა-შემოხლა, რის შემდეგაც მოზარდებმა ფარდულთან გადაინაცვლეს. კონფლიქტი მიდიოდა დათო სარალიძესა და გ.ჯ.-ს შორის“, - განაცხადა ფხაკაძემ.

პროკურორმა ფოტომასალაც წარადგინა, რომელიც მისი თქმით, მკვლელობის ადგილზე არის გადაღებული.

ფხაკაძის თქმით, კონფლიქტი ხორავას ქუჩაზე სამ ლოკაციაზე მიმდინარეობდა, ხოლო დავით სარალიძეს ჭრილობები არასრულწლოვანმა გ. ბ.-მ მიაყენა.

ფხაკაძის თქმით, იმის გამო, რომ საქმე ეხებოდა არასრულწლოვნებს და პროცესები მიმდინარეობდა დახურულ რეჟიმში, მათ არ ჰქონდათ იმის საშუალება, რომ საქმის მასალები და ინფორმაცია გაესაჯაროებინათ.

ცნობისთვის, ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისიის დღევანდელ სხდომაზე შინაგან საქმეთა სამინისტროს წარმომადგენელ კახა სირაძესა და საქმის პროკურორ ზვიად ფხაკაძეს უსვამენ კითხვებს.