პოლიტიკა

როგორც აქამდე მოგვიგია, ისე გავიმარჯვებთ ამ პროცესშიც - გიორგი ვაშაძე

ოპოზიცია ცესკო-ს არჩევნების გაყალბების მზადებაში ადანაშაულებს. საკუთარი პრეტენზიების შესახებ მათ არასამთავრობო სექტორთან ისაუბრეს.

საუბარია საოლქო კომისიების ნეიტრალურ კვოტაზე, რომელიც წესით მიუკერძოებელი კადრებით უნდა დაკომპლექტდეს, თუმცა ოპოზიციის მტკიცებით, ამ კვოტას სუს-ი და „ქართული ოცნება“ ავსებენ.

„საქართველოს ახალგაზრდა იურისტთა ასოციაციის“ აღმასრულებელი დირექტორის, ირმა პავლიაშვილის განცხადებით, დაკომპლექტების წესში ძირეული რეფორმა უნდა განხორციელდეს.

„წლების პრაქტიკა არის და ხშირი ყოფილა, როდესაც, მაგალითად, წინა არჩევნებზე პოლიტიკური პარტიების მიერ დანიშნული და წარდგენილი კომისიის წევრები შემდგომ უკვე შემდგომ არჩევნებზე გადაინაცვლებდნენ და პროფესიული ნიშნით ირჩეოდნენ, თუმცა, საკანონმდებლო დონეზე ამ მხრივ აკრძალვა არ არის და ჩვენი რეკომენდაცია სწორედ იმაში მდგომარეობდა, რომ შეიცვალოს დაკომპლექტების წესი, ძირეული რეფორმა განხორციელდეს და რეალურად, ასე ვთქვათ, პროფესიულად არჩეული პირები, სწორედ ნეიტრალურობის პრინციპიდან გამომდინარე ირჩეოდნენ“, - განაცხადა პავლიაშვილმა.

საპრეზიდენტო კანდიდატ გრიგოლ ვაშაძის საარჩევნო შტაბის ხელმძღვანელის, გიორგი ვაშაძის თქმით, გაყალბება მხოლოდ არჩევნების დღეს არ ხდება.

„მე ვაფრთხილებ თამარ ჟვანიას, მოგიწევს აბსოლუტურად პასუხის გაცემა ყველაფერზე, პირადად თქვენ ხართ პასუხისმგებელი ამ ყველა საკითხთან დაკავშირებით და სამართლებრივად, კანონის შესაბამისად, როგორც აქამდე მოგვიგია, ისე გავიმარჯვებთ ამ პროცესშიც“, - განაცხადა ვაშაძემ.