საზოგადოება

როგორია ჯანდაცვის მსოფლიო ორგანიზაციის რეკომენდაციები ნიღბების ტარებასთან დაკავშირებით

ქსოვილის ნიღბებით შესაძლებელია, თავიდან ავიცილოთ საზოგადოებრივ ადგილებში კორონავირუსის გავრცელება, სადაც ადამიანებს შორის დისტანციის დაცვა გართულებულია. მაგრამ ამ ფუნქციის შესრულება შესაძლებელია მხოლოდ სამშრიანი ნიღბების შემთხვევაში, - ნათქვამია ჯანდაცვის მსოფლიო ორგანიზაციის ახალ რეკომენდაციებში.

ნიღბების მასალის იდეალური კომბინაცია ასეთია:

შიგნითა, სახისკენ მიმართული შრე უნდა იყოს ტენის კარგად შემწოვი მასალისაგან მაგალითად, ბამბის ქსოვილისაგან.

გარეთა შრეს უნდა ჰქონდეს ტენის ამრეკლავი თვისება, რათა ირგვლივ მყოფი ადამიანების სასუნთქი გზებიდან წამოსულმა სითხის მცირე წვეთებმა არ შეაღწიოს ნიღაბში. ასეთი თვისებით ხასიათდება სინთეტიკური ქსოვილები-პოლიპროპილენი, პოლიესთერი ან მათი ნარევი.

შუა შრემ უნდა შეასრულოს ფილტრის როლი და შეაკავოს ვირუსები. ამ მიზნისთვის გამოდგება სინთეტიკური არაქსოვილოვანი მასალა, როგორიცაა პოლიპროპილენი, უკიდურეს შემთხვევაში ბამბის ქსოვილიც წავა, მაგრამ მას ფილტრის ფუნქცია უფრო ნაკლებად აქვს, სინთეტიკასთან შედარებით.

არაა რეკომენდებული ნიღბების შეკერვა ელასტიური ტრიკოტაჟის მასალისგან, რადგანაც ამ ქსოვილს ფილტრის ფუნქცია ნაკლებად აქვს და მათი გარეცხვა არ შეიძლება მაღალ ტემპერატურაზე.

ნიღაბი უნდა ფარავდეს ცხვირს, ლოყებს, ნიკაპს და მჭიდროდ უნდა ეკვროდეს კანს, წინააღმდეგ შემთხვევაში ნიღბის ტარებას აზრი არ აქვს.

ჯანდაცვის მსოფლიო ორგანიზაციის რეკომენდაციაში ხაზგასმით არის აღნიშნული, რომ ნიღაბი უნდა იყოს ინდივიდუალური. ამიტომ ნურავის ათხოვებთ თქვენს ნიღაბს. ნიღაბის დასველებისთანავე საჭიროა მისი მშრალით შეცვლა, ამიტომ რამოდენიმე ნიღაბი ყოველთვის უნდა გქონდეთ თან.

ნახმარი ნიღბის მოხსნისას, არ შეეხოთ მის გარეთა შრეს, თვალებსა და პირს. სველი ნიღაბი ჩადეთ ჰერმეტულ პაკეტში და დაიბანეთ ხელები.

ქსოვილის ნიღაბი ხშირად უნდა გაირეცხოს საპნით ან სარეცხი ფხვნილით, ამასთან სასურველია 60 გრადუსზე.

წყარო