სამართალი

როგორ დატოვა ბრალდებულმა გიორგი ბაჩიაშვილმა საქართველო? -პასუხი ჯერჯერობით არცერთ უწყებას არ აქვს

„თანაინვესტირების ფონდის“ ყოფილი გენერალური დირექტორის, გიორგი ბაჩიაშვილის საქმის პროკურორის მიხეილ სადრაძის განცხადებით, ქვეყნის დატოვების ნებართვა ბაჩიაშვილს მათი უწყებისთვის არც უთხოვია და არც გაუციათ.

მეტიც, პროკურორი, მიხეილ სადრაძე ბაჩიაშვილის წინააღმდეგ ახალი სისხლის სამართლის საქმის წარმოებას აანონსებს, ამჯერად საზღვრის უკანონო კვეთაზე.

„გიორგი ბაჩიაშვილს ნამდვილად ჩამორთმეული აქვს პასპორტი. აკრძალული აქვს საზღვრის დატოვება, მაგრამ ფაქტობრივი მოცემულობა არის ის, რაც არის. ეს საკითხი საჭიროებს შესწავლას, რაც გულისხმობს იმას, რომ აუცილებლად დაიწყება გამოძიება.

რაც შეეხება აღკვეთის ღონისძიების შეცვლას, ესეც საჭიროებს შეფასებას და ამ მოცემულობიდან გამომდინარე, გადავწყვეტთ როგორ და რანაირი სამართლებრივი რეაგირება და შეფასება გვექნება“, - განაცხადა მიხეილ სადრაძემ.

ცნობისთვის, თანაინვესტირების ფონდის ყოფილმა ხელმძღვანელმა, გიორგი ბაჩიაშვილმა საქართველო დატოვა. ამის შესახებ მან სოციალურ ქსელში დაწერა.

ბაჩიაშვილის თქმით, მისი წასვლა არა დანებება, არამედ გააზრებული და სტრატეგიული ნაბიჯია. ასევე, როგორც ის ამბობს, „ამ ბრძოლაში მისი გარეთ ყოფნა გაცილებით უფრო სარგებლიანი იქნება“.