პოლიტიკა

როდესაც რუსეთი სამხრეთ ოსეთსა და აფხაზეთში შეიჭრა, ბუშის ადმინისტრაციას არაფერი გაუკეთებია- ჯონ ქერი

ამერიკის 44 -ე პრეზიდენტის ბარაქ ობამას ადმინისტრაციის სახელმწიფო მდივნის ჯონ ქერის თქმით, წინამორბედი პრეზიდენტის ჯორჯ ბუშის ადმინისტრაციას 2008 წლის რუსეთ-საქართველოს ომისთვის აქტიურად არ უპასუხია.

ამის შესახებ ქერიმ ვაშინგტონში, მშვიდობის ინსტიტუტში გამართულ კონფერენციაზე განაცხადა , სადაც ამერიკის ყოფილი და მომავალი მაღალი რანგის ოფიციალური პირები, მსოფლიოში ამერიკის როლის თემაზე საუბრობდნენ და განიხილავდნენ იმას, თუ როგორი უნდა იყოს ამერიკის საგარეო პოლიტიკა ახალი ადმინისტრაციის პირობებში.

სხვა საკითხებთან ერთად, ჯონ ქერიმ რუსეთის საკითხსაც შეეხო და აღნიშნა, რომ ობამას ადმინისტრაციის წინამორბედ ბუშის ადმინისტრაციას აქტიურად არ უპასუხია საქართველო-რუსეთის ომისთვის.

„არ მინდა ისე გამომივიდეს, თითქოს განვსჯი, თუმცა როდესაც რუსეთი საქართველოში, სამხრეთ ოსეთსა და აფხაზეთში შეიჭრა, მაშინ არაფერი გაკეთებულა, სანქციები არ დაწესებულა, საერთოდ არაფერი. ჩვენ მოვედით და როდესაც უკრაინის კრიზისი დაიწყო, ევროპის მხარდაჭერა მოვიპოვეთ და სანქციები დავუწესეთ რუსეთს. ეს სანქციები მძიმე ტვირთია რუსეთისთვის. ჩვენ ნათლად ვთქვით, რომ რუსეთს ფასის გადახდა მოუწევდა ამისთვის. ევროპაში ზოგს სურს სანქციების შეწყვეტა, თუმცა ჩვენ ვახერხებდით შეგვენარჩუნებინა სანქციები მინსკის შეთანხმების იმპლემენტაციისთვის“. - აღნიშნა კერიმ.

თუმცა სახელმწიფო მდივანი არ შეხებია მისი ადმინისტრაციის 2009 წლის გადაწყვეტილებას, ომიდან რამდენიმე თვეში, დაეწყო „გადატვირთვა“ რუსეთთან.

მონიკა დავლიანიძე