პოლიტიკა

რეზოლუციის ტექსტის 95%-ზე ფაქტობრივად შეთანხმებული ვართ - ირაკლი სესიაშვილი

თავდაცვისა და უშიშროების საპარლამენტო კომიტეტის თავმჯდომარის, ირაკლი სესიაშვილის განცხადებით, არჩილ ტატუნაშვილის დაღუპვასთან დაკავშირებული რეზოლუციის ტექსტის 95% შეთანხმებულია უმრავლესობასა და უმცირესობას შორის.

„მე შინაგანი რწმენა მაქვს, რომ ჩვენ მხარს დავუჭერთ ერთ რეზოლუციას. ეს სჭირდება ქვეყანას და არა რომელიმე პოლიტიკურ ძალას. რაც შეეხება იმ მცირე დეტალს, რომელიც შეიძლება იყოს ჩვენს შორის განსხვავება, არა მგონია, წარმოადგენდეს ისეთ ღირებულ პრინციპს, რომლის გამოც ოპოზიციამ უარი უნდა განაცხადოს რეზოლუციის მხარდაჭერაზე. ტექსტის უდიდეს ნაწილზე, 95%-ზე ფაქტობრივად, შეთანხმებული ვართ და სულისკვეთება არის ის, რაც ჩვენი ქვეყნის ინტერესების დაცვას სჭირდება. რაც შეეხება ერთ დეტალს, ამაზე უნდა ვიმსჯელოთ", - განაცხადა სესიაშვილმა.

რაც შეეხება იმას, ემხრობა თუ არა დეპუტატი რუსეთისთვის სანქციების დაწესებას, სესიაშვილმა განაცხადა, რომ მას აქვს არგუმენტები, რომელზეც შეიძლება მსჯელობა სესიის ფორმატში.

ცნობისთვის, საპარლამენტო უმრავლესობამ და უმცირესობამ თავ-თავიანთი რეზოლუციები წარადგინეს ტატუნაშვილის საქმეზე. უმრავლესობა ითხოვს საერთაშორისო გამოძიების ჩატარებას, ხოლო ოპოზიცია - „ტატუნაშვილი-ოთხოზორიას“ სიის შექმნასა და რუსეთისთვის სანქციების დაწესებას. ორივე მხარე რეზოლუციის ერთიან ტექსტზე მსჯელობს.