პოლიტიკა

„რესპუბლიკურმა პარტიამ“ ე.წ. მოსმენების კანონზე საკონსტიტუციო სასამრთლოში 20 ინდივიდუალური სარჩელი შეიტანა

დღეს „რესპუბლიკური პარტიის“ წევრებმა ე.წ. მოსმენების კანონის წინააღმდეგ საკონსტიტუციო სასამართლოში 20 ინდივიდუალური სარჩელი შეიტანეს.

„რესპუბლიკელების“ წევრის, თამარ კორძაიას შეფასებით, პარლამენტის მიერ დამტკიცებული კანონი არ შეესაბამება საკონსტიტუციო სასამართლოს მოთხოვნებს და არღვევს ადამიანის პირადი ცხოვრების ხელშეუხებლობის უფლებას.

„იმ დებულებების გასაჩივრებას მოვითხოვთ, რომლებიც ხელყოფს პირადი ცხოვრების ხელშეუხებლობას. ეს გამოიხატება იმაში, რომ ისეთ უწყებას აქვს შესაძლებლობა მოუსმინოს ადამიანებს, რომლებიც სუს-ის დაქვემდებარებაშია. საკონსტიტუციო სასამართლომ თქვა, რომ ამ სისტემის არსებობა არ შეიძლება და არაკონსტიტუციურია. ამიტომ ჩვენ გვაქვს მოლოდინი, რომ სასამართლო ისევ გააუქმებს ამ კანონს, იმიტომ რომ კანონმა არ გაიზიარა საკონსტიტუციო სასამართლოს მოთხოვნა. ჩვენ 20 ინდივიდუალური სარჩელი წარმოვადგინეთ", - განაცხადა კორძაიამ.

შეგახსენებთ, რომ 1-ლ მარტს პარლამენტმა მესამე მოსმენით მხარი დაუჭირა უმრავლესობის მიერ შემუშავებულ საკონსტიტუციო ცვლილებათა პაკეტს ე.წ. ფარული მოსმენების შესახებ. 20 მარტს პრეზიდენტმა ამ კანონს ვეტო დაადო, რომელიც პარლამენტმა ორი დღის შემდეგ დაძლია. ვეტოს დაძლევის შემდეგ ქვეყნის პირველმა პირმა ხელი მოაწერა ე.წ. ფარული მოსმენების კანონს, ხოლო 31 მარტს ის ამოქმედდა.

აღნიშნულ კანონპროექტზე მუშაობა მას შემდეგ გახდა საჭირო, რაც 2016 წლის 14 აპრილს საკონსტიტუციო სასამართლომ ფარული მოსმენების არსებული წესი არაკონსტიტუციურად ცნო.