პოლიტიკა

„რესპუბლიკური“ პარტია საპრეზიდენტო არჩევნების მეორე ტურში გრიგოლ ვაშაძეს უჭერს მხარს

„რესპუბლიკური“ პარტია სრულად უჭერს მხარს გრიგოლ ვაშაძეს საპრეზიდენტო არჩევნების მეორე ტურში.

შესაბამისი განცხადება, „რესპუბლიკური“ პარტიის ერთ-ერთმა ლიდერმა ლევან ბერძენიშვილმა გააკეთა.

დღეს "რესპუბლიკური" პარტიის ლიდერები გრიგოლ ვაშაძის შტაბში მივიდნენ და საპრეზიდენტო არჩევნების მეორე ტურში გაერთიანებული ოპოზიციის საპრეზიდენტო კანდიდატს სრული მხარდაჭერა გამოუცხადეს.

„ჩვენ მოვედით, რომ გამოვხატოთ მხარდაჭერა გრიგოლ ვაშაძის მიმართ. „რესპუბლიკური“ პარტია მას მხარს უჭერს“, -განაცხადა ლევან ბერძენიშვილმა.

მისი თქმით, გაერთიანებულ ოპოზიციასთან „რესპუბლიკური“ პარტიის წევრებმა ყველა ის საკითხი განიხილეს, რაც საერთო ინტერესის საგანია.

„მათ შორის ისეთი საკითხები, როგორიცაა რომ პრეზიდენტმა უნდა იზრუნოს, რომ პრეამბლუაში ავიდეს ევროპული ინტეგრაციის საკითხები ნატო და ა.შ. რაც არის კონსტიტუციაში მაგრამ პრეამბლუაში არ არის. ჩვენ ასევე ვიმსჯელეთ იმაზე, რომ ვინც არიან შეძენა-შენახვაზე მსჯავრდებულები პრეზიდენტმა შეიძლება შეიწყალოს“-ამბობს ბერძენიშვილი.

მისივე თქმით, ,,რესპუბლიკური“ პარტია მის აქტივში არსებული სრული რესურსით გრიგოლ ვაშაძეს მხარს დაუჭერს, თუმცა ეს არ ნიშნავს, რომ გაერთიანებულ ოპოზიციასთან ერთიანდება.

„ჩვენ მოვედით იმისათვის, რომ მხარი დავუჭიროთ გრიგოლ ვაშაძეს საპრეზიდენტო არჩევნებში. გაერთიანებულ ოპოზიციასთან სხვა საკითხებზე კავშირზე არ გვქონია საუბარი,“-ამბობს ლევან ბერძენიშვილი.