სამართალი

რაც უსიამოვნო იყო ყველაფერი გასაჯაროვდა, ამიტომ, სხდომა საჯარო უნდა იყოს - დედა სედონია

დედა სედონიას განცხადებით, ყველაფერი რაც ე.წ ციანიდის საქმესთან დაკავშირებით უსიამოვნო იყო, უკვე გასაჯაროვდა, შესაბამისად, სასამართლო პროცესი ღია უნდა იყოს.

როგორც დედა სედოანიმ მედიას ე.წ ციანიდის საქმის სასამართლო პროცესის დაწყებამდე თბილისის საქალაქო სასამართლოსთან განუცხადა, მამა გიორგი მამალაძემ უკეთესად იცის, რომ პროცესზე საპატრიარქოს საზიანო არაფერი გასაჯაროვდება.

„მგონია, რომ რაც უსიამოვნო იყო, ყველაფერი გასაჯაროვდა. ხალხმა საკმარისად ინერვიულა, კითხვები საკმარისი გაჩნდა. ვფიქრობ, რომ იმ დონეზე უნდა გასაჯაროვდეს, რომ საზოგადოების ნაწილმა შეძლოს პასუხების მიღება. ნაწილი ამბობს, რომ იმიტომ უნდა დაიხუროს, რომ საპატრიარქოს იმიჯს შეეხება და რაღაცა ისეთი შეიძლება გაჟღერდეს. მაგრამ, მამა გიორგიმ უკეთესად იცის, ალბათ, რომ არაფერი საზიანო არ გახმაურდება. ასე რომ, რადგან თვითონ ითხოვს, ანგარიში უნდა გავუწიოთ და საჯარო იყოს სხდომა, სხდომის დახურვამ შეიძლება უფრო მეტი კითხვა დატოვოს“,- აღნიშნა დედა სიდონიამ.

ე.წ ციანიდის საქმის პროკურორები სასამართლო პროცესის დახურვას ითხოვენ, რადგან მათი თქმით, პროცესზე მამა გიორგი მამალაძის პირადი სახის ისეთი ინფორმაცია შეიძლება გასაჯაროვდეს, რაც არ არის აუცილებელი რომ საზოგადოებამ იცოდეს.

თავად დეკანოზი გიორგი მამალაძე და მისი ადვოკატები, სხდომის საჯაროობის მომხრე არიან.

ადვოკატ გიორგი ფანცულაიას თქმით, პროკურორები პროცესის დახურვას იმიტომ ითხოვენ, რომ მათ „ბევრი რამე აქვთ დასამალი“.

მონიკა დავლიანიძე