პოლიტიკა

რაც კი პოლიტიკაში ტიპაჟი არსებობს, ყველანაირ ტიპაჟს აერთიანებს „ქართული ოცნება“ - დავით ზურაბიშვილი

რაც კი პოლიტიკაში ტიპაჟი არსებობს, ყველანაირ ტიპაჟს აერთიანებს „ქართული ოცნება“, – განაცხადა დღეს გამართულ პრესკონფერენციაზე რესპუბლიკური პარტიის წევრმა, დავით ზურაბიშვილმა და აღნიშნულით “ქართული ოცნების” ხელისუფლებაში საკონსტიტუციო უმრავლესობით მოსვლას გამოეხმაურა.

მისი თქმით, საკონსტიტუციო უმრავლესობის საფრთხეები ყოველთვის არსებობს.

“იმის საფრთხე, რომ კონსტიტუცია იქნება რაღაც გარკვეული მიზნებისთვის გამოყენებული, რა თქმა უნდა არსებობს. თუმცა, დამოუკიდებელი საქართველოს ისტორიაში, ორჯერ იყო ისეთი სიტუაცია, როდესაც ხელისუფლებას არ ჰქონდა საკონსტიტუციო უმრავლესობა, 1992-1995 წლებში და 2012-2016 წლებში. ძალიან მწარე გამოცდილება გვაქვს. ჩვენ ვართ გინესის წიგნში შესატანი ქვეყანა, ამდენი ცვლილება კონსტიტუციაში არსად არ შესულა ბოლო 10-15 წლის მანძილზე, სააკაშვილის დროს თითქმის კვირაში ერთხელ იცვლებოდა კონსტიტუცია”, – განაცხადა ზურაბიშვილმა.

მისი შეფასებით, „ქართული ოცნება“ „მოქალაქეთა კავშირს“ ჰგავს.

„ქართული ოცნების“ გუნდი ძალიან ჭრელია. გარკვეულ ნაწილს პატივს ვცემ და არც მათ კვალიფიკაციაში მეპარება ეჭვი, მაგრამ არის ხალხი, რომლებიც საერთოდ რას აკეთებენ იქ, ვერ ვხვდები. რაც კი პოლიტიკაში ტიპაჟი არსებობს, ყველანაირ ტიპაჟს აერთიაენებს „ქართული ოცნება“. ეს არის ძალაუფლების ვერტიკალი, ნაკრები რომელიც ძალაუფლების გარშემო არიან შემოგროვილი. ამათ რეალურად ერთი ადამიანი აერთიანებს, ფორმალურად „ქართული ოცნება“ კვირიკაშვილია, მაგრამ თვითონ შემადგენლობაშიც არის ასე ვთქვათ „კვირიკაშვილის გუნდი“, „კალაძის ხალხი“, ბიძინა ივანიშვილის რეკომენდაციით მისული ხალხი და ა.შ. „ქართული ოცნება“ უფრო „მოქალაქეთა კავშირს“ ჰგავს. ეს რაღაც ძალაუფლებრივი გაერთიანებაა, ეს პარტია არ არის”, – განაცხადა დავით ზურაბიშვილმა.

ნინო ექვთიმიშვილი