პოლიტიკა

რასაც თქვენ აპირებთ ამ არჩევნებზე, არ გაგივათ, ბატონებო - გიორგი ვაშაძე ცესკო-ს

გრიგოლ ვაშაძის საარჩევნო შტაბის უფროსმა, გიორგი ვაშაძემ ცენტრალური საარჩევნო კომისია საპრეზიდენტო არჩევნების გაყალბებაში დაადანაშაულა.

მისი ინფორმაციით, ცესკო საარჩევნო ოლქების საარჩევნო კომისიის წევრებად ნიშნავს „ქართული ოცნებისა“ და სუს-ის წევრების ახლობლებს.

„ცენტრალურმა საარჩევნო კომისიამ თავისივე პირველივე გადაწყვეტილებებით საარჩევნო ადმინისტრაციაში ტოტალური გაყალბების საარჩევნო მექანიზმის ჩამოყალიბება დაიწყო. მან, ფაქტობრივად, გადააბარა რაიონებში მთლიანად საარჩევნო ადმინისტრაციების ფორმირება „ქართული ოცნების“ შტაბებსა და სუს-ის წარმოამდგენლებს.

ჩვენს ხელთ არსებული დოკუმენტაციით, რომელიც ჩვენ გუშინ მოვიპოვეთ, დგინდება, რომ 76 ე.წ. დამოუკიდებელი საოლქო საარჩევნო კომისიის წევრების ვაკანსიებზე მათ დანიშნეს ყოველგვარი გასაუბრებისა გარეშე „ქართული ოცნების“ შტაბის წევრების მეუღლეები, ოჯახის წევრები ან სუს-ის მაღალჩინოსნების ოჯახის წევრები ან თვითონ საარჩევნო ადმინისტრაციაში მომუშავე თანამშრომლების მეუღლეები და ოჯახის წევრები.

შემიძლია, რამდენიმე მაგალითი გითხრათ, რომლებიც იყოფა სამ კატეგორიად. პირველი - ესაა „ქართული ოცნების“ პირდაპირ მაღალი თანამდებობის პირების ოჯახის წევრები, მეორე - ესაა ცესკოს თანამშრომლების ოჯახის წევრები და მესამე - ესაა სუს-ის მაღალი თანამდებობის პირების ოჯახის წევრები, რაც ფაქტობრივად მიუთითებს, რომ ისინი აპირებენ არჩევნების ტოტალურ გაყალბებას.

მე მინდა, მოვუწოდო ცესკოს და ვუთხრა, არცერთ ხმას არ გაგაყალბებინებთ. ის, რასაც თქვენ აპირებთ ამ არჩევნებზე, არ გაგივათ, ბატონებო. და ძალიან გთხოვთ, შესაბამისი რეაგირება მოახდინოთ თითოეულ ფაქტზე, რომელიც ხელთ მაქვს და 76 ოლქიდან თითქმის ყველა ოლქზე ირკვევა, რომ თქვენ გინდათ გააყალბოთ არჩევნები“, -განაცხადა ვაშაძემ.

გიორგი ვაშაძემ ერთ-ერთ მაგალითად მოიყვანა ის, რომ ცესკოს თავჯდომარემ თამარ ჟვანიამ თელავში, საარჩევნო ოლქის დამოუკიდებელ წევრად საკუთარი მაზლის ცოლი, ლეილა სიბაშვილი დანიშნა.